გირჩის ერთ-ერთი ლიდერის, იაგო ხვიჩიას თქმით, იმისთვის, რომ არჩევნები "გადაარჩინონ" და ქვეყანა "ღრმა, პოლიტიკურ კრიზისში" არ შევიდეს, ყველა დარღვევა ყურადღებით უნდა შეისწავლონ და ოქმების გასწორება მოლაპარაკებების ნაწილი უნდა იყოს. ამის შესახებ მან რუსთავი 2-ის ეთერში ისაუბრა.

"მე ვხედავ გზას იმის, თუ როგორ შეიძლება ამ არჩევნების გადარჩენა. არჩევნების ხელახლა ჩატარებაც პოლიტიკური კრიზისია. მე მგონია, რომ არჩევნები უნდა გადავარჩინოთ, იქიდან გამომდინარე, რომ მეორე ტურში მაინც გვქონდეს რეალური არჩევნები. ამ არჩევნების რეალურობას აწი არავინ არ დაიჯერებს, იმიტომ, რომ ვიცით, 56%-იდან დაიწყეს გამოცხადება და რომ მიხვდნენ ზედმეტი მოუვიდათ, ჩამოვიდნენ 48%-ზე. უბრალოდ, ზედმეტი მოუვიდათ გესმის? ამაშია საქმე. აწი ამ არჩევნებს ვერაფრით ვერ გააკეთილშობილებ, მაგრამ შენ შეგიძლია, მეორე არჩევნები გახადო კონკურენტული", — განაცხადა ხვიჩიამ.

ხვიჩიას განცხადებითვე, შევა თუ არა ზურაბ ჯაფარიძე პარლამენტში, ეს ოპოზიციის ქმედებებზე იქნება დამოკიდებული, რადგან მისი განმარტებით, მათ "მარტო შესვლა" არ სურთ.

"ჩემი აზრით, ზურაბ ჯაფარიძის და ნებისმიერი ოპოზიციის ქმედება დამოკიდებულია დანარჩენი კოლეგის ქმედებაზე. ჩვენ მარტო შესვლა არ გვინდა, მნიშვნელობა არა აქვს ზურაბ ჯაფარიძე შევა თუ არა დიდუბიდან მაჟორიტარად, ჩვენ მარტო შესვლა არ გვინდა", — აღნიშნა მან.

31 ოქტომბრის საპარლამენტო არჩევნებში ბარიერგადალახულმა რვავე ოპოზიციურმა პარტიამ მანდატებზე უარი თქვა. ისინი პარლამენტის ლეგიტიმურობას არ აღიარებენ და ამბობენ, რომ არჩევნების დღეს გაყალბების არაერთი შემთხვევა დაფიქსირდება.

პარლამენტში არ შედიან ევროპული საქართველო, ლელო, ნაციონალური მოძრაობა — ძალა ერთობაშია, მოქალაქეები, სტრატეგია აღმაშენებელი, გირჩი, ლეიბორისტული პარტია და პატრიოტთა ალიანსი.

მანდატების დათმობაზე ოპოზიციის ზოგიერთი წარმომადგენელი ჯერ კიდევ 31 ოქტომბრის ღამეს საუბრობდა. ცესკოს წინასწარი მონაცემებით, ამომრჩეველთა ხმები ასე გადანაწილდა:

  • ქართული ოცნება — 48,23%;
  • ენმ — ძალა ერთობაშია — 27,16%;
  • ევროპული საქართველო — 3,78%
  • ლელო — 3,16%;
  • სტრატეგია აღმაშენებელი — 3,15%;
  • პატრიოტთა ალიანსი — 3,14%;
  • გირჩი — 2,89%;
  • მოქალაქეები — 1,33%;
  • ლეიბორისტული პარტია — 1%;

ოპოზიციური პარტიებში აცხადებენ, რომ არალეგიტიმურ პარლამენტში შესვლა არასწორი იქნება და ვადამდელი არჩევნების დანიშვნას ითხოვენ. პატრიოტთა ალიანსის გარდა, ბარიერგადალახული პარტიები ახლა საერთო აქციების გამართვას აპირებს. პატრიოტთა ალიანსში კი აცხადებენ, რომ დამოუკიდებლად იმოქმედებენ.