ქართული ოცნების ერთ-ერთი ლიდერის, არჩილ თალაკვაძის თქმით ოპოზიცია მეორე ტურზე უარს იმიტომ ამბობს, რომ გამარჯვების იმედი არ აქვს და ეს ერთგვარი პოლიტიკური კაპიტულაციაა.

ჩემი ინფორმაციით, ოპოზიციის წარმომადგენლების დიდი ნაწილი, რომლებსაც მეორე ტურებში უნდა მიეღოთ მონაწილეობა, ისინი პროპორციული სიით უკვე არიან შესული პარლამენტში და მათ მეორე ტურში გამარჯვების იმედი არ აქვთ. არჩევნებთან დაკავშირებულ ამ საკითხებს ისინი აფორმებენ ისე, თითქოს პროტესტის ნიშნად არ მიიღებენ მონაწილეობას, სინამდვილეში ეს არის პოლიტიკური კაპიტულაცია მეორე ტურის წინ, მათ იციან, რომ მეორე ტურებში დამარცხდებიან და ურჩევნიათ, არ მიიღონ მონაწილეობა", — განაცხადა თალაკვაძემ.

31 ოქტომბრის საპარლამენტო არჩევნებში ბარიერგადალახულმა რვავე ოპოზიციურმა პარტიამ მანდატებზე უარი თქვა. ისინი პარლამენტის ლეგიტიმურობას არ აღიარებენ და ამბობენ, რომ არჩევნების დღეს გაყალბების არაერთი შემთხვევა დაფიქსირდება. ასევე, აცხადებენ, რომ გაყალბებას ცესკოს თავმჯდომარეც უწყობდა.

პარლამენტში არ შედიან ევროპული საქართველო, ლელო, ნაციონალური მოძრაობა — ძალა ერთობაშია, მოქალაქეები, სტრატეგია აღმაშენებელი, გირჩი, ლეიბორისტული პარტია და პატრიოტთა ალიანსი.

მანდატების დათმობაზე ოპოზიციის ზოგიერთი წარმომადგენელი ჯერ კიდევ 31 ოქტომბრის ღამეს საუბრობდა. ცესკოს წინასწარი მონაცემებით, ამომრჩეველთა ხმები ასე გადანაწილდა:

  • ქართული ოცნება — 48,23%;
  • ენმ — ძალა ერთობაშია — 27,16%;
  • ევროპული საქართველო — 3,78%
  • ლელო — 3,16%;
  • სტრატეგია აღმაშენებელი — 3,15%;
  • პატრიოტთა ალიანსი — 3,14%;
  • გირჩი — 2,89%;
  • მოქალაქეები — 1,33%;
  • ლეიბორისტული პარტია — 1%;

ოპოზიციური პარტიებში აცხადებენ, რომ არალეგიტიმურ პარლამენტში შესვლა არასწორი იქნება და ვადამდელი არჩევნების დანიშვნას ითხოვენ. პატრიოტთა ალიანსის გარდა, ბარიერგადალახული პარტიები ახლა საერთო აქციების გამართვას აპირებს. პატრიოტთა ალიანსში კი აცხადებენ, რომ დამოუკიდებლად იმოქმედებენ.