თბილისის მერის, კახა კალაძის თქმით, "ვითომ" სამშენებლო კომპანიები ავარიული შენობების ჩანაცვლების პროექტების წინასწარ "დატაცებას" ცდილობენ. კალაძე მოუწოდებს მოსახლეობას, რომ სანამ მერია დეტალურ გადაწყვეტილებებს არ მიიღებს, იმის შესახებ, თუ როგორ უნდა მოხდეს კონკრეტული არეალების განვითარება, არავისთან არანაირი ხელშეკრულება არ დადონ.

"რა თქმა უნდა, ავარიული შენობა-ნაგებობები ყველა რაიონში არსებობს, მაგრამ კონკრეტულად ვისაუბრებთ სამგორის, ვარკეთილის მესამე მასივზე, სადაც რაოდენობრივადაც ყველაზე მეტი გვაქვს ასეთი შენობა-ნაგებობები. საქმე ეხება მთლიანად ამ კვარტლის განაშენიანების კონცეფციას, რომელიც მერიამ შეიმუშავა, იმისთვის, რომ მოხდეს მათი ჩანაცვლება-განახლება. უახლოეს პერიოდში, ჩვენ დეველოპერულ და სამშენებლო სექტორს შევთავაზებთ ავარიული შენობების ჩანაცვლების ეკონომიკურად გამართულ კონცეფციას. იგი უკვე შემუშავებულია, თუმცა საკრებულოში ჯერ არ არის გადაგზავნილი. მიუხედავად ამისა, ვფიქრობ, ძალიან ბევრმა ადამიანმა გაიგო ამის შესახებ და დაიწყეს შეხვედრები ადგილობრივ მოსახლეობასთან. ისინი რადიკალურად განსხვავებულ ხედვას აცნობენ ამ ადამიენებს და ეს აბსოლუტურად განსხვავებულია ჩვენი კონცეფციისგან",— განაცხადა კალაძემ.

კალაძე მოუწოდებს კომპანიებს, რომ თავი შეიკავონ ასეთი ქმედებებისგან, რათა არ დაზარალდეს ეს პროცესები და შეცდომაში არ შევიდეს მოსახლეობა.