ქართული ოცნების ერთ-ერთი ლიდერისა და პროპორციული საარჩევნო სიის მეხუთე ნომრის, მამუკა მდინარაძის განცხადებით, ირაკლი ეძგვერაძე არის კრიმინალური ავტორიტეტი და ის გლდანში, მთელი დღის განმავლობაში, პროვოკაციებს აწყობდა.

მდინარაძის თქმით, ის, თანამოაზრეებთან ერთად გადაადგილდებოდა გლდანის რაიონის სხვადასხვა საარჩევნო უბანზე და შეურაცხყოფას აყენებდა, აგინებდა არა მხოლოდ ქართული ოცნების აქტივისტებს, არამედ ამომრჩევნებსაც.

"გლდანში ჰქონდა ადგილი ნაცმოძრაობის კანდიდატის, ნიკა მელიას მთავარი ზონდერის, ირაკლი ეძგვერაძის მხრიდან უმძმეს პროვოკაციებს არა ერთ ლოკაციაზე და არა ერთ უბანზე. [...]

ეს არის ცნობილი კრიმინალური ავრტორიტეტი [...] მას ზედმესახელად ჰქვია ჭყიპინა და მას გლდანში ყველა იცნობს, როგორც ძველ ბიჭს და ავტორიტეტს. არ ვიცი ჭყიპინების იმედზე თუ არიან ნაცმოძრაობის წარმომადგენლები", — განაცხადა მდინარაძემ.

მდინარაძე ამბობს, რომ მათ რამდენიმე დღით ადრე ჰქონდათ ინფორმაცია გლდანში შესაძლო დაპირისპირებებზე და ამის შესახებ საზოგადოებასაც აფრთხილებდნენ.

"ჩვენი ვარაუდი და ინფორმაცია, რომელიც გვქონდა ნაცმოძრაობის გლდანის შტაბიდან, 100%-ით გამართლდა", — ამბობს მდინარაძე.

მდინარაძე ამბობს, რომ ნაციონალური მოძრაობის მხრიდან მსგავსი პროვოკაციების საფუძველი ისაა, რომ "ისინი პირწმინდად აგებენ არჩევნებს". იგი მოწოდებს ქართული ოცნების აქტივისტებს და მხარდამჭერებს არ აჰყვნენ პროვოკაციებს "რაც არ უნდა ძნელი იყოს ეს ყველაფერი".

გლდანის ერთ-ერთ საარჩევნო უბანზე ხმაური იყო. თბილისის პოლიციის დეპარტამენტის დირექტორის, ვაჟა სირაძის განცხადებით, გლდანში მომხდარი დაპირისპირების ფაქტზე 5 პირი დააკავეს. მედიაში ვრცელდება ინფორმაცია, რომ ერთ-ერთი მათგანი სწორედ ირაკლი ეძგვერაძეა.

გაიგეთ მეტი: