კორონავირუსის მზარდი სტატისტიკის გამო საფრანგეთის პრეზიდენტმა, ემანუელ მაკრონმა ქვეყანაში "ლოქდაუნი" გამოაცხადა, რომელიც ნოემბერშიც გაგრძელდება. მკაცრი საიზოლაციო შეზღუდვები დღეს გერმანიამაც შემოიღო.

30 ოქტომბრიდან მოქალაქეებს სახლიდან გასვლა მხოლოდ აუცილებელი სამუშაოსთვისა და სამედიცინო მიზნებისთვის შეეძლებათ. რესტორნები და ბარები დაიკეტება, თუმცა სკოლები და ფაბრიკები მუშაობას გააგრძელებენ.

მაკრონის თქმით, ქვეყანა შეიძლება კორონავირუსის "მეორე ტალღამ წალეკოს, რომელიც პირველ ტალღაზე რთული იქნება". როგორც მიმართვის დროს პრეზიდენტმა განაცხადა, ინტენსიური თერაპიის საწოლების ნახევარი კოვიდინფიცირებულებს აქვთ დაკავებული.

აპრილის შემდეგ საფრანგეთში კორონავირუსით გარდაცვალების ყველაზე მაღალი შემთხვევები ფიქსირდება. 27 ოქტომბერს ინფიცირებულთა რაოდენობა 33 ათასი გაიზარდა.

ახალი შეზღუდვების თანახმად, სახლის დასატოვებლად მოქალაქეებმა სპეციალური ფორმა უნდა შეავსონ, რათა გასვლა დაასაბუთონ. გარდა ამისა, იკრძალება საზოგადოებრივი შეკრებები.

შეზღუდვები პირველ დეკემბრამდე იმოქმედებს და ყოველ ორ კვირაშ გადაიხედება. მაკრონმა იმედოვნა, რომ ოჯახები გაერთიანებას შობისთვის შეძლებენ.