"ჩვენ უნდა დავასრულოთ ქართული ოცნება და დავიწყოთ მუშაობა, რომ საქართველო გახდეს ფლაგმანი რეგიონში", — ამ სიტყვებით რესპუბლიკის მოედანზე შეკრებილებს ლელოს გენერალურმა მდივანმა ბადრი ჯაფარიძემ მიმართა.

რესპუბლიკის მოედანზე ლელოს მიერ გამართულ წინასაარჩევნო აქციაზე ბადრი ჯაფარიძემ მოსახლეობას 28 ოქტომბრის ისტორიული მნიშვნელობა შეახსენა.

"დღეს, 28 ოქტომბერს შესრულდა ზუსტად 30 წელი საბჭოთა ოკუპაციის შემდგომ, საქართველოში პირველი დემოკრატიული არჩევნების ჩატარების დღიდან. 1990 წლის 28 ოქტომბერს, ზვიად გამსახურდიას ლიდერობით, მრგვალმა მაგიდამ გაიმარჯვა და დაამარცხა კომუნისტური პარტია. უზენაესმა საბჭომ შეასრულა ისტორიული მისია ჩვენი ქვეყნის და ჩვენი ხალხის წინაშე: აღდგა საქართველოს დამოუკიდებლობა, შეიქმნა დამოუკიდებლობის აღდგენის აქტი და მე მქონდა ბედნიერება ჩემ მეგობრებთან ერთად, ხელი მომეწერა ქვეყნის ამ მნიშვნელოვან დოკუმენტზე. სამწუხაროდ, სახელმწიფო გადატრიალებამ შეაჩერა უზენაესი საბჭოს საქმიანობა და დღემდე არ არის შეფასებული ის უბედურება, რომელიც თავს დაგვატყდამაშინ და მას შემდეგ", — განაცხადა ბადრი ჯაფარიძემ.

ბადრი ჯაფარიძემ საზოგადოებას ლელო საქართველოს მთავარი მისია, მიზნები და უპირატესობები გააცნო.

"ლელო საქართველოსთვის შეიქმნა იმისთვის, რომ ერთხელ და სამუდამოდ ჩვენს ქვეყანაში დავუსვათ წერტილი სიძულვილს. დავუსვათ წერტილი საზოგადოების დაყოფას, დანაწევრებას. ადამიანების ურთიერთდაპირისპირებას. ჩვენ ვართ პოლიტიკური ძალა, რომელმაც საზოგადოებას შესთავაზა ყველაზე გამართული თანმიმდევრული გეგმა. გეგმა, რომელიც ქვეყანას გამოიყვანს იმ კრიზისიდან, სადაც შეგვიყვანა ქართულმა ოცნებამ. ეს ქვეყანა ვეღარ გაუძლებს იმ არაკომპეტენტურ და მავნებლურ პოლიტიკას, რომელსაც წლებია აწარმოებს ქართული ოცნება და მისი ლიდერი ბიძინა ივანიშვილი", — აცხადებს ჯაფარიძე.

ლელოს გენერალური მდივანმა საკუთარ სიტყვაში ხაზი გაუსვა, რომ დამოუკიდებლობის მოპოვებიდან 30 წლის შემდეგ, ახლადშექმნილი ლელო საქართველოს უპირატესობას მოუტანს რეგიონში.

"31 ოქტომბერს ჩვენ უნდა დავასრულოთ ქართული ოცნება, დავიწყოთ მუშაობა, რომ ჩვენი ქვეყანა გახდეს ფლაგმანი რეგიონში და მის ფარგლებს გარეთ. ჩვენი ქვეყანა უნდა გახდეს ფლაგმანი ეკონომიკურად, ფლაგმანი ჯანდაცვის და განათლების სისტემების და ინფრასტრუქტურის განვითარებით დონით. ასეთ ქვეყანას ავაშენებთ ჩვენ თქვენთან ერთად. ჩვენი გეგმის განხორციელება მოგვცემს საშუალებას საქართველო დაბრუნდეს მის ისტორიულ ადგილზე — ევროპულ ოჯახში. ღმერთი იყოს ჩვენი მფარველი", — განაცხადა ბადრი ჯაფარიძემ.