ევროპული საქართველოს ერთ-ერთი ლიდერის, გიგი უგულავას განცხადებით, ევროპულ საქართველოს IPM-თან არანაირი კვლევა არ დაუკვეთავს. აღნიშნულით უგულავამ კობახიძის მიერ დღეს ბრიფინგზე გაკეთებულ განცხადებას უპასუხა.

"ევროპულ საქართველოს არანაირი კვლევა არ დაუკვეთია IPM-თან, ეს არის კობახიძის და სუს-ის და შეშინებული ქართული ოცნების კრუნჩხვები, ისინი ემზადებიან არჩევნების გასაყალბებლად და მოიგონეს ამ, სრულიად ანტისახელმწიფოებრივი ქმედების, ლოქდაუნის საწინააღმდეგოდ ზღაპარი, სისულელე და ბოდვა, იმისთვის, რომ შემდეგ, მათი პროპაგანდისტული მანქანით გადაიტანონ საზოგადოების ყურადღება იმ რეალური პრობლემიდან, რის შექმნასაც ისინი აპირებენ ქვეყანაში", — განაცხადა უგულავამ.

დღეს, 28 ოქტომბერს ქართული ოცნების აღმასრულებელმა მდივანმა და პარტიული სიის მე-3 ნომერმა, ირაკლი კობახიძემ ბრიფინგზე განაცხადა, რომ ევროპულმა საქართველომ IPM-ს კვლევა დაუკვეთა, რომლის ანკეტაშიც ჩაწერეს კითხვა — პროტესტის რა ფორმა იქნება თქვენთვის მისაღები იმ შემთხვევაში, თუ არჩევნების შედეგებმა არ დაგაკმაყოფილათ. კობახიძის თქმით, ამ კითხვის პასუხებში მოქალაქეებს ასარჩევად მოთხოვნის დაკმაყოფილების მიზნით ფიზიკური ან შეიარაღებული ძალის გამოყენება შესთავაზეს.