ამერიკის შეერთებული შტატების ელჩი საქართველოში, კელი დეგნანის განცხადებით, ისურვებდა დასრულდეს ინდივიდების პოლიტიკა, რომელიც ქართულ საზოგადოებას ჰყოფს. ელჩის თქმით, მას სურს ნახოს მშვიდი და წყნარი გარემო არჩევნებისა და მის მომდევნო დღეს.

"ვისურვებდი, დასრულდეს ინდივიდების პოლიტიკა, რომელიც ჰყოფს ქართულ საზოგადოებას და გზას უხსნის რუსეთსა და სხვა არაკეთილსინდისიერ აქტორებს, რომ დათესონ დაპირისპირება და დაბნეულობა ქვეყანაში", — აცხადებს დეგნანი.

საზოგადოებრივ საქმეთა ოფიცრის მოვალეობის შემსრულებელთან ინტერვიუში დეგნანმა აღნიშნა, რომ სურს, ნახოს კანდიდატები, რომლებიც ყურადღებას იმის ახსნაზე ამახვილებენ, როგორ შეასრულებენ ამომრჩეველთა პრიორიტეტებს, როგორიცაა, მაგალითად, სამუშაო ადგილების შექმნა.

დეგნანმა, ასევე, სამართლიანი და თავისუფალი არჩევნების მოდელი განმარტა და თქვა, რომ, მიუხედავად იმისა, რომ არჩევნების დღე ძალიან მნიშვნელოვანია, თავისუფალი და სამართლიანი არჩევნები სცილდება მხოლოდ არჩევნების დღეს.

"ეს გულისხმობს პროცესს, რომელიც უნდა იყოს უსაფრთხო, ინკლუზიური და სანდო. სამართლიან და თავისუფალ არჩევნებში არ არსებობს ამომრჩევლის დაშინება, მოსყიდვა, ხალხის იძულება, რომ გადაუღონ ფოტო საარჩევნო ბიულეტენს ან მიიღონ სამსახურიდან გათავისუფლების მუქარა. ქართველები იმსახურებენ, რომ თავისუფალ და სამართლიან არჩევნებში მისცენ ხმა და მსურს, შაბათს ამომრჩეველთა მაღალი აქტივობა ვიხილო ", — ამბობს ელჩი.

მისივე თქმით, თავისუფალი არჩევნები ნიშნავს, როცა ერთი ადამიანი უდრის ერთ ხმას და არა გაყალბებას გამარჯვებისთვის. დეგნანი მოსახლეობას რეკომენდაციების დაცვით 31 ოქტომბერს გასამართ არჩევნებში მონაწილეობისკენ მოუწოდებს.