თბილისის მერია პანდემიით დაზარალებულ მოქალაქეებს გადამზადებისა და დასაქმების ხელშეწყობის პროგრამას იწყებს. ამის შესახებ დღეს კახა კალაძის მოადგილემ, ანდრია ბასილაიამ ისაუბრა.

მისი განმარტებით, პროგრამა ითვალისწინებს იმ მოქალაქეების სწავლებისა და დასაქმების ხელშეწყობას, რომლებმაც პანდემიის პერიოდში სამსახური დაკარგეს.

სწავლება სახელმწიფო პროფესიული კოლეჯების ბაზაზე წარიმართება და 15 ნოემბრიდან დაიწყება. მოკლევადიანი სასწავლო პროგრამის ხანგრძლივობა 2 თვეა.

დაინტერესებულ პირებს 26 ოქტომბრიდან 10 ნოემბრის ჩათვლით შეეძლებათ ონლაინ რეგისტრაცია ვებგვერდზე www.dasakmdi.ge

მერიის ინფორმაციით, პროგრამის ფარგლებში გლდანის პროფესიული მომზადების ცენტრი, კოლეჯი იკაროსი, კოლეჯი მერმისი და კოლეჯი სპექტრი 30-ზე მეტი მიმართულებით ასწავლიან. მათ შორის, სამშენებლო, საინჟინრო, დიზაინის, სურსათის, ინფორმაციული ტექნოლოგიების და სატრანსპორტო სფეროში. პროგრამაში მონაწილეობა შეეძლება 18 წლის მოქალაქეს, რომელიც თბილისშია რეგისტრირებული და წარმოადგენს პანდემიის პერიოდში სამსახურიდან გათავისუფლების ცნობას ან ამავე პერიოდში, სახელმწიფოს მიერ გაცემული ფინანსური დახმარების ცნობას.

უწყებაში აღნიშნავენ, რომ ვებგვერდი შეასრულებს საკომუნიკაციო და საკოორდინაციო ფუნქციასაც კერძო სექტორს, მუნიციპალიტეტს, პროფესიულ სასწავლებლებსა და დასაქმების მსურველ მოქალაქეებს შორის.

გარდა რეგისტრაციისა, საიტზე მოქალაქეები მიიღებენ ინფორმაციას პროგრამის შესახებ, გაეცნობიან მოთხოვნად სპეციალობებს და საშუალო ანაზღაურებას. ამავე ვებგვერდზე კერძო სექტორი შეძლებს სხვადასხვა სპეციალობის კადრებზე მოთხოვნის დაფიქსირებას.