Searchlight Pictures-ის ბობ დილანის ბიოგრაფიული ფილმს, რომელშიც ცნობილი მომღერლის როლი ტიმოთი შალამემ უნდა შეასრულოს, მალე ნამდვილად ვერ ვიხილავთ. ამაზე ფილმის კინოოპერატრმა ფიდონ პაპამაიკლმა განაცხადა.

ფილმი პირველად იანვარში დაანონსდა და ის ელაიჯა უორდის წიგნის ადაპტაცია იქნება. მასში მოთხრობილია ცნობილი მომღერლისა და მუსიკოსის ცხოვრება და მისი საკამათო გადასვლა ტრადიციული მუსიკიდან როკში. ჭორების თანახმად, ფილმის სახელი "Going Electric" უნდა იყოს, მისი რეჟისორი კი — ჯეიმს მენგოლდი.

შალამემ უკვე დაიწყო გიტარაზე დაკვრის სწავლა, აგვისტოში კი მან საკუთარ ტვიტერზე დილანის სიმღერების ტექსტები დაპოსტა და ამით ფილმში თავის როლზე მიგვანიშნა. თუმცა, როგორც ახლა ირკვევა, ბიოგრაფიულ ფილმზე მუშაობა განუსაზღვრელი ვადით გადაიდო.

"ბობ დილანზე ფილმი უნდა გადაგვეღო მენგოლდთან ერთად, თუმცა ეს არ მოხდა", — თქვა პაპამაიკლმა, რომელსაც მენგოლდთან კოლაბორაცია 2019 წლის ოსკარზე ნომინირებულ Ford v. Ferrari-ში ჰქონდა. გარდა ამისა, ის მის გუნდს ინდიანა ჯონსის მე-5 ფილმშიც დაუბრუნდება.

"არ მგონია, რომ პროექტი მოკვდა, თუმცა მისი შესრულება COVID-ის ეპოქაში საკმაოდ რთული იქნება, რადგან ის დიდწილად პატარა კლუბებში უნდა გადავიღოთ", — დაამატა მან.

პაპამაიკლის თქმით, პროექტის მომავალში განხორციელება ჯერ კიდევ შესაძლებელია, თუმცა მას არ დაუდასტურებია, ეს ნამდვილად მოხდება თუ არა ან როდის განიხილავენ ფილმზე მუშაობის განახლებას.