პენიტენციური სამსახურის ინფორმაციით, გლდანის #8 დაწესებულების საკარანტინე სივრცეში მყოფ ორ ბრალდებულს კორონავირუსი დაუდასტურდა. უწყებაში აცხადებენ, რომ მათი მდგომარეობა სტაბილურია.

"ისინი სასწრაფო სამედიცინო დახმარების ბრიგადამ დაუყოვნებლივ გადაიყვანა სამოქალაქო სექტორის სპეციალიზებულ, ე.წ. კოვიდკლინიკაში, სადაც მათზე ზედამხედველობა ელექტრონული სამაჯურის მეშვეობით განხორციელდება, რათა არ იყოს კლინიკაში მათთან ერთად ესკორტის ოფიცრების ყოფნის საჭიროება. ინფიცირებულების მდგომარეობა სტაბილურია", — აღნიშნავენ უწყებაში.

გარდა ამისა, პენიტენციურ სამსახურში განმარტავენ, რომ ერთი ბრალდებული 11 ოქტომბერს, მეორე კი, 12 ოქტომბერს დააკავეს და ახალდაკავებული ბრალდებულები 12-დღიანი საკარანტინო ვადის გასვლის შემდეგ PCR ტესტირებას გადიან. როგორც უწყებაში ამბობენ, სხვა პატიმრებთან ისინი მხოლოდ უარყოფითი პასუხის გადაჰყავთ და ამ ორ ბრალდებულს ვირუსი გადაყვანამდე დაუდასტურდა.

მათივე ინფორმაციით, 23 ოქტომბერს PCR ტესტირება სულ 30 პატიმარს ჩაუტარეს და ორის გარდა ყველას პასუხი უარყოფითი იყო, მათ შორის, ინფიცირებულების თანამესაკნეების.

"პრევენციის მიზნით, ინფიცირებული პატიმრების ოთხივე თანამესაკნე სპეციალური პენიტენციური სამსახურის საკარანტინო სივრცეში არის გადაყვანილი, სადაც 12-დღიანი საკარანტინო პერიოდის გასვლის შემდეგ კვლავ გაივლიან PCR ტესტირებას და მხოლოდ ამის შემდეგ მოხდება მათი ე.წ. მიმღებ დაწესებულებაში (N8 დაწესებულება) გადაყვანა", — აღნიშნავენ უწყებაში.

რაც შეეხება ინფიცირებულებთან კონტაქტში მყოფ დაწესებულების თანამშრომლებს, პენიტენციური სამსახურის ინფორმაციით, ისინი საკარანტინო სივრცეში ინდივიდუალური დამცავი საშუალებებით აღჭურვილები არიან, ამასთან ყაზარმულ რეჟიმში მუშაობენ და დაწესებულებაში შესვლამდე PCR ტესტირებას გადიან, ხოლო 23 ოქტომბრიდან ყოველ მესამე დღეს ანტიგენ-ანტისხეულზე სწრაფი ტესტით შემოწმდებიან.

"საკანს, სადაც ინფიცირებული პირები იმყოფებოდნენ, არაგეგმიური დეზინფექცია ჩაუტარდა. გეგმიურად დეზინფექცია დაწესებულებებში პერიოდულად ტარდება", — აღნიშნულია განცხადებაში.