ბელარუსის პრეზიდენტმა ლუკაშენკომ თავის მიწაზე მოყვანილი კარტოფილის ნახევარი ომონის (სპეციალური დანიშნულების მობილური რაზმის) თანამშრომლებს გადასცა, რომლებიც მას პროტესტის ჩახშობაში ეხმარებოდნენ. ინფორმაციას ამის შესახებ ტელეგრამ არხი პულ პერვოგო ავრცელებს, რომელიც ლუკაშენკოს პრესსამსახურთან არის დაკავშირებული.

როგორც გამოცემა Meduza წერს, სავარაუდოდ საუბარია მინსკის რეზიდენციასთან არსებულ ნაკვეთზე, სადაც ლუკაშენკოს არა მხოლოდ კარტოფილი, არამედ საზამთრობიეც მოჰყავს. მოსავალს ამ ნაკვეთზე აგვისტოს ბოლოს ან სექტემბრის დასაწყისში კრეფენ.

სოციალურ ქსელებში უკვე დაიწყეს იმაზე ხუმრობა, რომ ლუკაშენკომ ომონის თანამშრომლებს ხელფასი კარტოფილით გადაუხადა.

9 აგვისტოს ჩატარებულ საპრეზიდენტო არჩევნების შედეგებს მოსახლეობა არ აღიარებს. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.