თბილისის საქალაქო სასამართლომ რატი გაჩეჩილაძის საქმეზე წინასასამართლო სხდომა 20 თებერვალს, 13 საათზე ჩანიშნა. გაჩეჩილაძე ტელეკომპანია რუსთავი 2-ის გენერალური დირექტორის მიმართ განხორციელებული ძალადობის ბრალდებით დააკავეს.

გუშინ, თბილისის საქალაქო სასამართლოს საგამოძიებო და წინასასამართლო სხდომის კოლეგიამ ცვლილებით დააკმაყოფილა ბრალდების მხარის (პროკურატურის) შუამდგომლობა და გაჩეჩილაძე აღკვეთის ღონისძიების სახით გირაო - 5 000 ათასი ლარი შეუფარდა. გარდა ამისა, ბრალდებული დაუყოვნებლივ გათავისუფლდა სასამართლო სხდომის დარბაზიდან.

„არ არსებობდა პირის დაკავების გადაუდებელი აუცილებლობა მიმალვის საფუძვლით, ვინაიდან რატი გაჩეჩილაძე საკუთარი ინიციატივით გამოცხადდა საგამოძიებო ორგანოში,“ - ასე დაასაბუთა სასამართლომ ბრალდებულის სხდომათა დარბაზიდან გათავისუფლების გადაწყვეტილება.

წარდგენილი ბრალდების თანახმად, გაჩეჩილაძე ბრალი ედება ძალადობაში, ცემაში, რამაც დაზარალებულის ფიზიკური ტკივილი გამოიწვია, მაგრამ არ მოჰყოლია ჯანმრთელობის განზრახ მსუბუქი დაზიანება, რამაც მისი ხანმოკლე მოშლა ან საერთო შრომისუნარიანობის უმნიშვნელო ან არამყარი დაკარგვა გამოიწვია (სსკ 126).

8 იანვარს საქართველოს შინაგან საქმეთა სამინისტროს თბილისის პოლიციის დეპარტამენტის დეტექტივების სამმართველოს თანამშრომლებმა რატი გაჩეჩილაძე რესტორან დაინინგ რუმში ტელეკომპანია რუსთავის 2-ის გენერალური დირექტორის მიმართ ფიზიკურ და სიტყვიერი შეურაცხყოფის მიყენების ბრალდებით დააკავეს.