ლელოს პოლიტიკური საბჭოს წევრი, მედეა მეტრეველი აცხადებს, რომ ქართული ოცნების მთავრობა თავისი უმოქმედობით თუ მავნებლური არაკომპეტენტურობით ყოველდღიურად გვაყურებინებს გელათის ჩამოშლის უმძიმეს პროცესს. მეტრეველი მოუწოდებს განათლებისა და კულტურის სამინიტროს დროულად აიღოს ხელში მართვის სადავეები ძეგლის გადასარჩენად.

"ქართულმა (რუსულმა) ოცნებამ ააფეთქა საყდრისის უძველესი ოქროს მაღარო, წაშალა ოქროს მოპოვების ტრადიციის ისტორიული კვალი ჩვენს ქვეყნაში და ახლა უკვე, თავისი უმოქმედობით თუ მავნებლური არაკომპეტენტურობით, ყოველდღიურად გვაყურებინებს გელათის ჩამოშლის უმძიმეს პროცესს. ვითარება, რომელიც შესაძლოა ქართული კულტურისთვის უმძიმესი შედეგით დასრულდეს, სრულებით არაადეკვატურად იმართება ხელისუფლების მიერ", — განაცხადა მედეა მეტრეველმა.

მეტრეველის თქმით, დაგვიანებული რეაგირება, გულგრილობა, საჯაროობის ნაკლებობა, საზოგადოების შეცდომაში შეყვანა, თანხების არამიზნობრივი ხარჯვა არის ის მთავარი მიზეზები, რის შედეგადაც მსოფლიო კულტურული მემკვიდრეობის ძეგლის, გელათის მთავარი ტაძრის და წმ. გიორგის ტაძრის უნიკალური ფერწერა და ქვა ნადგურდება.

მეტრეველმა აღნიშნა, რომ კულტურის სამინისტრო თავს ანგარიშვალდებულადაც არ გრძნობს, საზოგადოებას მიაწოდოს ინფორმაცია მთავრობის გეგმის შესახებ, რომელიც სავარაუდოდ, არც არსებობს და პროცესები მხოლოდ ძეგლთა დაცვის სააგენტოს, ერთი უწყების იმედად არის მიტოვებული.

მეტრეველი ICOMOS საქართველოს მიერ 12 ოქტომბრის შეფასებას გელათის სამონასტრო კომპლექსის მთავარ ტაძარში და წმ. გიორგის ეკლესიაში შექმნილ უმძიმეს ვითარებასაც გამოეხმაურა. სადაც ნახსენებია, რომ სახელმწიფომ სრულად უნდა აიღოს პასუხისმგებლობა და უზრუნველყოს საჭირო რესურსების მობილიზება კრიტიკული მდგომარეობის დროულად და ადეკვატურად მართვისთვის.

"მოვუწოდებთ საქართველოს განათლებისა და კულტურის სამინისტროს, დროულად გადადგას ქმედითი ნაბიჯები ქართული კულტურის უმნიშვნელოვანესი ძეგლის გადასარჩენად, რომელიც სრულად მიტოვებულია ხელისუფლებისაგან, რაც მთავარია, სჭირდება მსოფლიო მემკვიდრეობის კონვენციის შესაბამისი მართვა, რისი რესურსიც, სამწუხაროდ, არ აღმოაჩნდა შესაბამის პასუხისმგებელ უწყებებს. რაც ყველაზე მთავარია, ხელისუფლებამ უმოკლეს ვადებში უზრუნველყოს საერთაშორისო ორგანიზაციების და ექსპერტების ჩართვა რესტავრაციის პროცესში, მით უფრო რომ ICOMOS საქართველოს შეფასებით საქართველოს მწირი და არადამაკმაყოფილებელი გამოცდილება აქვს საეკლესიო ხუროთმოძღვრების კრამიტით რესტავრაციის საკითხებში", — განაცხადა მედეა მეტრეველმა.

ლელოს პოლიტიკური საბჭოს წევრი მნიშვნელოვნად მიიჩნევს, რომ საქართველოს კულტურული მემკვიდრეობის დაცვის სააგენტომ გაასაჯაროოს გელათის ღვთისმშობლისა და წმ. გიორგის ტაძრების რესტავრაცია-კონსერვაციის სრული პროექტი; 2017-2020 წლების სააგენტოს მონიტორინგის და ჩატარებული სამუშაოების ანგარიშები; წმ. გიორგის ტაძრების დროებითი გადახურვების სრული პროექტი და სხვა დეტალი რაც ამ საქმეს უკავშირდება; ასევე, UNESCO-ს მსოფლიო მემკვიდრეობის ცენტრში და საერთაშორისო ICOMOS-ში გაგზავნილი ანგარიშები და UNESCO-ს მსოფლიო მემკვიდრეობის ცენტრისა და საერთაშორისო ICOMOS-ის შეფასებები გელათის მონასტერზე ჩასატარებელ სამუშაოებზე.