ქართული ოცნების აღმასრულებელი მდივანის, ირაკლი კობახიძის განცხადებით, გუშინ მოხდა თავდასხმა ქართული ოცნების მხარდამჭერზე, რომელსაც მიაყენეს მძიმე ფიზიკური შეურაცხყოფა, რასაც "ოცნების" მხრიდან მოჰყვა "არასწორი პასუხი", რის გამოც, ორივე მხარე უნდა დაისაჯოს.

"გუშინ იყო საკმაოდ სერიოზული ინციდენტი. იყო თავდასხმა ქართული ოცნების მხარდამჭერზე, რომელსაც მიაყენეს მძიმე ფიზიკური შეურაცხყოფა და ამ უმსგავსობას, სამწუხაროდ, მოჰყვა უფრო დიდი უმსგავსობა. სამწუხაროდ, იმ ადამიანების მხრიდან, რომლებიც ჩვენს შტაბთან არიან დაკავშირებული, რომელსაც, ჩვენ, ბუნებრივია, ვგმობთ.

აქ კიდევ ერთხელ გავიმეორებ რაც ვთქვით მაქამდე, რომ აუცილებელია, ასეთ შემთხვევაში იყოს სათანადო რეაგირება სამართალდამცავი ორგანოების მხრიდან, ვისი მხრიდანაც არ უნდა მოდიოდეს არასწორი საქციელი, სამართალდარღვევა და სხვა ტიპის უმსგავსობა, ერთადერთი და სწორი გზა არის სამართალდამცავი სტრუქტურების დროული რეაგირება. ვინც ფიზიკური შეურაცხყოფა მიაყენა ქართული ოცნების წარმომადგენლებს, ისინი უნდა დაისაჯონ და ვინც ამაზე არასწორი პასუხი გასცა, ისინიც აუცილებლად უნდა დაისაჯონ", — განაცხადა კობახიძემ.

გუშინ ბოლნისის მუნიციპალიტეტის სოფელ ნახიდურში გაერთიანებული ოპოზიცია ძალა ერთობაშიას კანდიდატის, კახა ოქრიაშვილის შტაბის წევრ ლევან მიქელაძეს თავს დაესხნენ. ადგილობრივ შტაბში On.ge-ს განუცხადეს, რომ მიქელაძეს სოფელ მუხრანიდან ორი ავტომანქანით აედევნენ და დაპირისპირება ნახიდურში გაგრძელდა. ელგუჯა ჯაფარიძის თქმით, დამტვრეულია მანქანა, იყო გასროლაც, რის შედეგადაც ტყვია ავტომობილის უკანა ბამპერს მოხვდა.

გაიგეთ მეტი: