პარტია გირჩი დღეს, 19 ოქტომბერს სახელოსნო ბარის ტერიტორიაზე ამომარჩევლებთან შეხვედრის საღამოს გამართავს.

პარტიის თქმით, სახელმწიფო სტრუქტურების მხრიდან ნებისმიერი ქმედება წინასაარჩევნო კამპანიაში ხელის შეშლად იქნება აღქმული.

"ქართული ოცნების მთავრობის უკანონო ქმედებების და უფლებამოსილებების გადამეტების მიუხედავად, გირჩი დღეს, 19 ოქტომბერს, ბარი სახელოსნოს ტერიტორიაზე გამართავს ამომრჩევლებთან შეხვედრის მორიგ საღამოს.

სახელოსნო 22:00 საათის შემდეგ დაიხურება და მთელი ღამის განმავლობაში, ჩვენს მხარდამჭერებს ჩვენთან კომუნიკაციის და პარტიის იდეოლოგიაზე საუბრის შესაძლებლობა ექნებათ", — აცხადებს გირჩი.

17 ოქტომბერს გირჩის ლიდერმა, ზურაბ ჯაფარიძემ განაცხადა, რომ სახელოსნო ბარში, სადაც მათი შტაბია გახსნილი და ამომრჩეველთან შეხვედრას მართავდნენ, შინაგან საქმეთა სამინისტროს თანამშრომლები შევიდნენ. მისი თქმით, პოლიციელები ხელს უშლიდნენ გირჩის წევრებს აგიტაციის ჩატარებაში.

დღეს, 19 ოქტომბერს საკოორდინაციო საბჭოს დასრულების შემდეგ გამართულ ბრიფინგზე პრემიერმინისტრმა, გიორგი გახარიამ განაცხადა, რომ როდესაც მოქალაქეებს ჯერ კიდევ ბოლომდე გათვიცნობიერებული არ აქვთ რისკის ხარისხი, ამით მანიპულირება და მათი კლუბებსა და რესტორნებში "შეტყუება" მიუღებელია. მისივე თქმით, რამდენიმე კომპანია, რომლებიც "ვითომ" პოლიტიკურ პროცესებში ჩართულობით ცდილობენ მუშაობის გაგრძელებას დაჯარიმდებიან.

"რამდენიმე შემთხვევა იყო, როდესაც რამდენიმე კომპანიამ სცადა რაღაც შეფერილობებით ვითომ პოლიტიკურ პროცესებში იღებდნენ მონაწილეობას, მუშაობა გაეგრძელებინათ. პირადად გეუბნებით, გპირდებით, ყველა მათგანი იქნება დაჯარიმებული, თუ ეს შემთხვევები გაგრძელდება, მეორე შემთხვევა არის სისხლის სამართლის საქმე და ყველგან აღიძვრება სისხლის სამართლის საქმე", — განაცხადა პრემიერმინისტრმა.

15 ოქტომბერს პრემიერმინისტრმა განაცხადა, რომ 16 ოქტომბრიდან თბილისსა და იმერეთში 22 საათიდან რესტორნებისა და გასართობი დაწესებულებების მუშაობა შეიზღუდებოდა. თუმცა, კანონით დაშვებულია წინასაარჩევნო აგიტაციისთვის შეკრება. გირჩი სწორედ მსგავს ადგილებში მართავს შეხვედრებს ამომრჩეველთან.