ჯანდაცვის პოლიტიკის სამმართველოს უფროსის, ეკატერინე ადამიას განცხადებით, კორონავირუსთან საბრძოლველად დღეს ქვეყანაში 44 სამედიცინო დაწესებულებაა მობილიზებული. მისი თქმით, მობილიზებული საწოლების რაოდენობა 3 700-ია, ხოლო მათი გადანაწილება რეგიონების მიხედვით შემდეგია:

  • თბილისი — 18 კლინიკა; 1 987 საწოლი;
  • აჭარა — 11 კლინიკა; 731 საწოლი;
  • იმერეთი — 10 კლინიკა, 644 საწოლი;
  • სამეგრელო-ზემო სვანეთი — 2 კილინიკა; 190 საწოლი;
  • შიდა ქართლი — 1 კლინიკა, 164 საწოლი;
  • მცხეთა-მთიანეთი — 1 კლინიკა, 11 საწოლი;
  • გურია — 1 კლინიკა, 21 საწოლი.

მისი განმარტებით, მობილიზებულია 2 453 სასუნთქი აპარატიც. ამასთან, გადამზადებულია 3 900-ზე მეტი ექიმი, ასევე, 2 300-ზე მეტი მედდა და სანიტარი.

"ტრენინგი ჩაუტარდა, ასევე, 2 044-ზე მეტ პირველად ჯანდაცვის დაწესებულებას. პაციენტების სამართავად კი, მობილიზებულია 20 კოვიდ-სასტუმრო, სადაც 1 200-ზე მეტი ადამიანი იმყოფება. გარდა ამისა, შემუშავებულია დამატებეითი დაწესებულებების ნუსხა, რომელიც საჭიროების შემთხვევაში ჩაერთვება პროცესში", — განაცხადა ადამიამ.

მან, ასევე, აღნიშნა, რომ საწოლფონდის რაოდენობა დღეს ქვეყანაში იმაზე ჭარბია, ვიდრე ამის საჭიროება არსებობს. ადამიას თქმით, სულ 17 400-ზე მეტი საწოლია, რომელთაგან 2 900 ინტენსიური თერაპიისა და გადაუდებელი მედიცინისაა. მისივე განცხადებით, ქვეყნის მასშტაბით 17 990 ექიმია, მათ შორის, 500-მდე ინფექციონისტი, 1 400-ზე მეტი რეანიმატოლოგი. რაც შეეხება ექთნების რაოდენობას, იგი 14 800-ზე მეტია.