ევროპული საქართველოს წევრი, ირაკლი აბესაძე, იუსტიციის უმაღლესი საბჭოს თავმჯდომარედ, უზენაესი სასამართლოს თავმჯდომარის, ნინო ქადაგიძის არჩევას ეხმაურება.

"იუსტიციის უმაღლესი საბჭო და მასში მყოფი სასამართლო კლანის წარმომადგენლები სასამართლო სისტემის განვითარების და აღმასრულებელი ხელისუფლებისაგან რეალური პოლიტიკური დამოუკიდებლობის მოპოვების ერთ-ერთ მთავარ შემაფერხებელ ფაქტორად იქცნენ. და პირიქით, სწორედ ის სასამართლო კლანი, რომელიც იუსტიციის საბჭოშია თავმოყრილი იქცა ქართული ოცნების პოლიტიკურ პარტნიორად.

ამას ადასტურებს ის პოლიტიკურად მიკერძოებული პროცესი, რომელიც წარმართა იუსტიციის უმაღლესმა საბჭომ უზენაესი სასამართლოს მოსამართლეობის კანდიდატების შერჩევისას, რომელიც ასეთად შეფასდა არამარტო ქვეყნის შიგნით, არამედ ჩვენი საერთაშორისო პარტნიორების და ობიექტური დამკვირვებლების მხრიდანაც", — აცხადებს აბესაძე.

აბესაძის თქმით, სასამართლოს სჭირდება ფუნდამენტური ცვლილებები, რათა ის გახდეს პოლიტიკურად მიუკერძოებელი და სანდო, ხოლო იმ ფონზე, როდესაც თავმჯდომარის არჩევა მოხდა პოლიტიკური გავლენების ქვეშ, ეს ვერ დაუბრუნებს სისტემას სანდოობას.

"რა თქმა უნდა, იუსტიციის საბჭოში თავმჯდომარედ უზენაესი სასამართლოს თავმჯდომარის არჩევა არის მხოლოდ ფორმალური პროცედურა და არაფერი კავშირი ამას სასამართლო სისტემის გაჯანსაღებასთან არ აქვს. რეალურად გვჭირდება ფუნდამენტური რეფორმები სასამართლოში, გვჭირდება გარდამტეხი ცვლილებები სასამართლო სისტემაში, რაც უნდა მოიტანოს არჩევნებმა და დაიწყოს ევროპული საქართველოს და სხვა ოპოზიციური პარტიების შეთანხმებული გეგმის განხორციელება ნაფიც მსაჯულთა ინსტიტუტის გაფართოებასთან მიმართებით, სასამართლოების უფრო მეტ დამოუკიდებლობასთან და ინდივიდუალური მოსამართლის უფრო მეტი დამოუკიდებლობის გაფართოებასთან თუ უცხოელი მოსამართლეების მოწვევასთან დაკავშირებით. სწორედ ეს მოიტანს იმ გარდამტეხ ცვლილებებს, რომლებმაც სასამართლო სისტემას საზოგადოების ნდობა უნდა დაუბრუნოს", — განაცხადა აბესაძემ,