დიდუბე-ჩუღურეთის რაიონის დამოუკიდებელი მაჟორიტარობის კანდიდატის ანა დოლიძის განცხადებით, საარჩევნო კამპანიის ფარგლებში მოსახლეობასთან შეხვედრის დროს უცხო პირები უთვალთვალებენ და ფოტო/ვიდეოს იღებენ.

15 ოქტომბერს ანა დოლიძემ აღნიშნულ საკითხთან დაკავშირებით შინაგან საქმეთა სამინისტროს მიმართა და მოითხოვა, რომ დაზარალებულად ცნონ და საქმე აღიძრას საქართველოს სისხლის სამართლის კოდექსის 151 მუხლით.

"ჩემი კამპანიის თითოეულ შეხვედრას თან სდევს თვალთვალი და ვიდეო გადაღება. მე დღეს აქ მაქვს კონკრეტული ფაქტები, კონკრეტული ფოტოები ხალხის, ე.წ. ასინეთების, რომლებიც დაქირავებული ჰყავს გია ვოლსკის შტაბს და ქართულ ოცნებას", — განაცხადა ანა დოლიძემ.

ამასთან, ანა დოლიძემ გაიხსენა წერეთლის 105-ში მომხდარი ინციდენტი, რომელზეც თბილისის პოლიციის მთავარ სამმართველოში სისხლის სამართლის საქმეა აღძრული. კერძოდ, მოსახლეობასთან შეხვედრისას მას და გუნდის წარმომადგენლებს უცხო პირები თავს დაესხნენ და საარჩევნო კამპანია ჩაუშალეს.