ევროპული საქართველოს ლიდერი სერგი კაპანაძე აცხადებს, რომ კორონავირუსის შემთხვევათა მატება "ჩაფლავებული მთავრობის" კრიზისმენეტჯმენტის შედეგია.

"კარგად ჩანს, ვინ არის კორონას მხარეს და ვის უხარია ახლა ეპიდემიური მდგომარეობის გამწვავება. ყველაფერი მეორეხარისხოვანია, ოღონდ ბელადმა ძალაუფლება შეინარჩუნოს", — განაცხადა კაპანაძემ.

მისი თქმით, გართულებულ ეპიდსიტუაციის ფონზე სახელისუფლებო პროპაგანდა ოპოზიციის დადანაშაულებას ცდილობს.

"25-ზე რომ კარანტინი გამოცხადდა, მანქანებში წინ ჯდომა აიკრძალა, ქუჩებს რეცხავდნენ ისტერიულად, ონლაინ ვაჭრობა აიკრძალა, სკოლები და უნივერსიტეტები დაიკეტა, ყველა ფრენა გაუქმდა, კომენდანტის საათი დაწესდა, ჯარი რომ სიცხეს ზომავდა და ავტობუსები და მარშუტკები აიკრძალა... ოპოზიცია ვირუსის მხარეს არისო, რომ გვიყიჟინებდა სამთავრობო პროპაგანდა.... ეს ხომ გვახსოვს?

ახლა, 919-ის შემთხვევაში რა ხდება? ზემოთ ჩამოთვლილთაგან რამე? ნუ, გარდა ისევე ყიჟინისა ოპოზიციის წინააღმდეგ, რომ გარეჯი გავყიდეთ", — აცხადებს კაპანაძე.

კაპანაძის თქმით, ხელისუფლებას არჩევნების მოგების იმედი სწორედ შექმნილი ვითარების გამო აქვს. იგი მოსახლეობას დაფიქრებისკენ მოუწოდებს, რადგან ქართული ოცნების წარმოდგენილ 2021 წლის ბიუჯეტში კორონავირუსთან საბრძოლველად თანხა არ არის გათვალისწინებული.

"უბრალოდ არჩევნებს ელოდებიან, იქნებ კორონამ უშველოს და ხალხი არ მივიდეს და გაძვრნენ? და მერე რა ხდება? ერთი წამით დავფიქრდეთ მერე რა უბედურება დაიწყება, ეს რომ მართლა ასე მოხდეს. დავფიქრდეთ მერე ლარს რა მოუვა, ეკონომიკა როგორ კიდევ უფრო დაგვექცევა, ვალები რომ ავიღეთ მილიარდობით და ლარის გამყარებაში ჩავაქციეთ და ლარი მაინც გაიქცა, ამ ფულს როგორ გადავიხდით? დავფიქრდეთ, რომ 2021-ის ბიუჯეტში კორონას წინააღმდეგ საბრძოლველად 0 ლარი ჩადეს. დავფიქრდეთ. ახლა, როგორც არასდროს გვმართებს დაფიქრება", — აცხადებს სერგი კაპანაძე.

ენდელაძის განცხადებით, ამ დროისთვის ქვეყანაში სულ 7 073 აქტიური შემთხვევაა, მათგან 70-მდე პაცინეტი კრიტიკულად მძიმეა. ინფექციური საავადმყოფოს ბოსქირებული განყოფილების ხელმძღვანელის, მარინა ენდელაძის განცხადებით, დღეს დადასტურებული კორონავირუსის 919 შემთხვევიდან 366 თბილისში დაფიქსირდა, აჭარაში 286 ახალი შემთხვევაა, იმერეთი — 104, სამეგრელო — 57, ქვემო ქართლი — 44, შიდა ქართლი — 21, კახეთი — 13, გურია — 13, მცხეთა — 11, სამცხე-ჯავახეთი — 3, რაჭა — 1.

მარინა ენდელაძის თქმით, 15 ოქტომბერს საქართველოში კორონავირუსით 4 ადამიანი გარდაიცვალა, სულ — 113, გამოჯანმრთელდა — 208. საქართველოში სულ 14 440 დადასტურებული შემთხვევაა, მათგან 7 367 უკვე გამოჯანმრთელდა.

ამ დროისთვის კარანტინის რეჟიმში 5 792 ადამიანი იმყოფება, სტაციონარში მეთვალყურეობის ქვეშ კი — 836. კოვიდ სასტუმროში 1 042 პირი მკურნალობს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: