პარლამენტის თავმჯდომარემ, არჩილ თალაკვაძემ ანდრიუს კუბილიუსის განცხადებაზე თქვა, გაოცებულია ამ კომენტარით.

"მინდა გამოვეხმაურო ბატონი კუბილიუსის განცხადებას. როგორც მე ვნახე, მან თქვა, რომ დავით გარეჯის თემა, რომელიც დღეს არის საინტერესო საზოგადოებისთვის, სასაცილოაო. ჩვენთვის დავით გარეჯი ნამდვილად არ არის სასაცილო და მე პირადად გაოცებული ვარ ამ კომენტარით. ჩვენთვის ესოდენ მნიშვნელოვანი საკითხს ასეთ შეფასებას აძლევს, მე ვფიქრობ, რომ ეს არის კატეგორიულად მიუღებელი. იმედი მაქვს, რომ ბატონი კუბილიუსი ამ თავის განცხადებაზე გააკეთებს განმარტებებს", — განაცხადა თალაკვაძემ.

კითხვამ ემიჯნება თუ არა კუბილიუსის განცხადებას თალაკვაძე გააღიზიანა და თვითონ კითხვის ავტორ ჟურნალისტს მოსთხოვა პასუხის გაცემა.

"ეს არის პრობლემა ზუსტად. მოდიხართ კითხვით და თქვენი ელემენტარული სამოქალაქო პოზიცია არ გაგაჩნიათ[...] ბოდიშის მოხდას მე კი არა თქვენ უნდა ითხოვდეთ ამაზე, როდესაც დგახართ სვეტიცხოვლის ეზოში და პოზიცია არ გაგაჩნიათ", — თქვა თალაკვაძემ.

რაც შეეხება პოზიციას, პარლამენტის თავმჯდომარემ განაცხადა, რომ არავის მისცემენ უფლებას, დავით გარეჯის, ნებისმიერი კულტურული მემკვიდრეობის და ეროვნული საკითხი სასაცილოდ მოიხსენიოს.

ევროპარლამენტის წევრმა და ევრონესტის საპარლამენტო ასამბლეის თანათავმჯდომარემ, ანდრიუს კუბილიუსმა აზერბაიჯანთან საზღვრის დელიმიტაციის საქმეზე ბრალდებულების დაკავებას სასაცილოს უწოდა. კუბილიუსმა ტვიტერზე დაწერა, რომ ეს მაშინ ხდება, როცა ქართული ოცნება ოპოზიციას რეალური პრობლემებიდან ყურადღების გადატანაში ადანაშაულებს.