სტრატეგია აღმაშენებლის ლიდერის, გიორგი ვაშაძის თქმით, ის დებატებზე პრემიერმინისტრს, გიორგი გახარიას "სანაძლეოს" დაუდებს იმაზე, რომ ქართული ოცნება არჩევნებში 35-37%-ზე მეტს ვერ აიღებს და, ვინც შეცდება თავზე კვერცხის დატეხვას სთავაზობს.

"ქართული ოცნება ვერ აიღებს 35-37%-ზე მეტს, თუ გნებავთ სანაძლეოს დავუდებ ბატონ გახარიას დებატებზე. სანაძლეოს დავუდებ და გამოვიდნენ მაშინ და აღიარონ, რომ ცდებოდნენ, კვერცხი გავუტეხოთ თავზე მაშინ, ვინც მოიტყუება. რაც გინდა, მოვიფიქროთ", — განაცხადა ვაშაძემ პალიტრანიუსის ეთერში.

დებატები საზოგადოებრივი მაუწყებლის ეთერში 15 ოქტომებრსაა დანიშნული, თუმცა ჯერჯერობით უცნობია, ქართული ოცნებიდან ვინმე მიიღებს თუ არა დებატებში მონაწილეობას. ვაშაძის თქმით, თუ გიორგი გახარია დებატებზე არ მივა, ეს იმას ნიშნავს, რომ მას ეშინია.