აზერბაიჯანელი ჟურნალისტის აფგან მუხთარლინს გერმანიიდან გამოფრენა ფერხდება. როგორც მისმა ადვოკატმა, არჩილ ჩოფიკაშვილმა On.ge-ს უთხრა, თავდაპირველ მიზეზად საბუთების მოუწესრიგებლობა დაუსახელეს, რის შემდეგაც ბარგი ჩააბარებინეს და უკვე ბარგთან დაკავშირებულ პრობლემაზე მიუთითეს. მისივე თქმით, საბოლოოდ, მუხთარლის უთხრეს, რომ "რაღაც წესები შეიცვალა" და არ გამოუშვებდნენ.

ჩოფიკაშვილის განმარტებით, ფრენამდე საათ-ნახევარია დარჩენილი და ჯერ კიდევ არ იციან, მუხთარლი საქართველოში ჩამოვა თუ არა. ადვოკატი აცხადებს, რომ ჟურნალისტს საბუთები წესრიგში აქვს.

"ეტყობა მიზეზი ვერ მოდეს ვერაფერი და უთხრეს, წესები შეიცვალაო. გარე ძალები არ ვიცი, რა ძალებია ჩარეული, მაგრამ ფაქტია, რომ ხელს უშლის ჩვენი საკონსულო სამსახური, თუ რა სამსახურიც არის იქ წარმოდგენილი", — ამბობს ჩოფიკაშვილი.

თბილისიდან გატაცებული აზერბაიჯანელი ჟურნალისტი, აფგან მუხთარლი საქართველოში დღეს, 9 ოქტომბერს უნდა ჩამოვიდეს. ბაქოს ციხიდან გათავისუფლების შემდეგ ის გერმანიაში ოჯახთან ერთად ცხოვრობს.

თბილისიდან 2017 წლის 29 მაისს გაუჩინარებული ჟურნალისტი მეორე დღეს ბაქოს ციხეში აღმოჩნდა. იგი ამბობს, რომ საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხთარლი საზღვრის უკანონო კვეთის გამო დააკავეს.

მუხთარლის დაკავებიდან რამდენიმე კვირაში, აზერბაიჯანის მმართველი გუნდის პარლამენტარმა ელმან ნასიროვმა რადიო თავისუფლებასთან ინტერვიუში თქვა, რომ მუხთარლის დაკავება აზერბაიჯან-საქართველოს სპეცსამსახურების წარმატებული ოპერაცია იყო. საქმეზე გამოძიება საქართველოში ამ დრომდე მიმდინარეობს.

მუხთარლის აზერბაიჯანში 6-წლიანი პატიმრობა მიუსაჯეს. საერთაშორისო ადამიანის უფლებადამცველმა ორგანიზაციებმა იგი პოლიტიკურ პატიმრად აღიარეს.