ეკონომიკის მინისტრის, ნათია თურნავას განცხადებით, მათ საბანკო სექტორთან ტურიზმის სექტორისა და საოჯახო სასტუმროებისთვის სესხების მორიგი რესტრუქტურიზაციის შესაძლებლობა განიხილეს. მინისტრის თქმით, ბანკებმა ამის მზადყოფნა გამოთქვეს.

"მოხარული ვარ, რომ ბანკებმა გამოთქვეს მზადყოფნა, რა თქმა უნდა, თითოეული კონკრეტული შემთხვევის გათვალისწინებით, რადგან თითოეულ კონკრეტულ შემთხვევაში არის სხვადასხვა გარემოება, რაც მნიშვნელოვანია ბანკისთვის. მაგრამ მთლიანობაში არის მზადყოფნა ამისა. როდესაც მათ მიმართავენ მცირე, საშუალო ზომის საოჯახო სასტუმროები, ზომას არა აქვს მნიშვნელობა, ისინი მზად არიან, განიხილონ სესხების რესტრუქტურიზაცია", — განაცხადა თურნავამ.

თურნავას თქმით, მიუხედავად იმისა, ადგილობრივი ტურიზმის გახსნისა და დაშვების წყალობით, "მეტ-ნაკლებად ჩატარდა" ზაფხულის სეზონი და ამან "გარკვეული შვება" მიანიჭა ტურიზმს, ეს საკმარისი არ არის და განსაკუთრებით, საოჯახო სასტუმროებს პრობლემები კვლავ აქვთ.

აჭარაში, ასევე, თბილისში ტურიზმის სექტორის წარმომადგენლებმა რამდენჯერმე აქციები გამართეს. ისინი მთავრობას მიმართავენ და მათგან დახმარებას მოითხოვენ.