მართალია, პანდემიის გამო ისიც კი არ ვიცით ზუსტად, როდის შევძლებთ იმ ფილმების ხილვას, რომელთაც დიდი ხანი ველოდით, მაგრამ კინოსტუდიები შიგადაშიგ მაინც გვანებივრებენ ახალი ტრეილერებით და ჩვენც ისღა დაგვრჩენია, სამომავლოდ სანახავი ფილმების სიას შევმატოთ მათი სახელწოდებები.

355 — ასე ჰქვია ახალ ფილმს, რომლითაც განსაკუთრებულად მძაფრსიუჟეტიანი სანახაობის მოყვარულები დაინტერესდებიან. რამდენიმე საათის წინ გამოსული პირველი ტრეილერი კი თავისი ვარსკვლავური შემადგენლობით ნამდვილად დაძაბული ისტორიის გაცოცხლებას გვპირდება ეკრანებზე.

ტრეილერიდან უკვე შენიშნავდით, რომ ფილმის სიუჟეტი ძირითადად ქალი გმირების ირგვლივ ვითარდება, რომელთა როლებსაც ჰოლივუდის ისეთი ცნობილი სახეები ასრულებენ, როგორებიც არიან პენელოპე კრუზი, ჯესიკა ჩესტეინი, ლუპიტა ნიონგო და დაიანა კრიუგერი.

აღსანიშნავია, რომ თავდაპირველად სამსახიობო გუნდის წევრი იყო მარიონ კოტიარიც, თუმცა მისი ადგილი დაიანა კრიუგერმა დაიკავა.

სცენარი მსოფლიოს სხვადასხვა კუთხის ცნობილი ჯაშუში ქალების შესახებ მოგვითხრობს, რომლებიც ერთიანდებიან, რათა საერთო მტერს დაუპირისპირდნენ. მათი ჯგუფის, ისევე როგორც ფილმის, სახელწოდება 355-ია: ეს სახელი მე-18 საუკუნეში ამერიკის რევოლუციისას ცნობილი პირველი ჯაშუში ქალის საპატივცემულოდ შეირჩა, რომელსაც სწორედ აგენტ 355-ს უწოდებდნენ.

ამ ახალი კინოსურათის რეჟისორი საიმონ კინბერგია, რომელმაც გასულ წელს მარველის ფილმი ბნელი ფენიქსი (X-Men: Dark Phoenix) გადაიღო. სამწუხაროდ, მისი ეს პირველი სადებიუტო სრულმეტრაჟიანი ბლოკბასტერი წარუმატებელი აღმოჩდა — როგორც შემოსავლებით, ისე კრიტიკოსების შეფასებებით და იმედია, ამ ახალი ფილმით უკეთეს სანახაობას შესთავაზებს მაყურებლებს.

კინოსტუდია Universal Pictures პრემიერას 2021 წლის 15 იანვარს გეგმავს, თუმცა იმის გათვალისწინებით, რომ ეს თარიღები მუდმივად იცვლება, რთული სათქმელია, ზუსტად ამ დროს გამოვა თუ არა ფილმი კინოთეატრებში.