მთავრობამ ადამიანის უფლებათა ევროპულ სასამართლოში საქართველოდან ასარჩევ მოსამართლედ ალექსანდრე ბარამიძის, ნანა მჭედლიძისა და გიორგი ბადაშვილის კანდიდატურები დაამტკიცა.

მთავრობის მიერ დამტკიცებული კანდიდატებიდან, ერთ-ერთ მოსამართლეს ევროპის საბჭო 2016 წლის შემოდგომაზე აირჩევს.

როგორც იუსტიციის სამინისტრო აცხადებს, სტრასბურგის სასამართლოში საქართველოდან არჩეულ მოსამართლეს ვადა 2017 წელს ეწურება:

"დღემდე მისი (მოსამართლის) შერჩევის პროცედურა არ არსებობდა და გადაწყვეტილების მიღება ერთპიროვნულად ხდებოდა. მიმდინარე წელს, პირველად გაიწერა სტრასბურგის ქართველი მოსამართლის არჩევის წესი. მოსამართლეობის მსურველმა 47-მა კანდიდატმა ჯერ ტესტირებები გაიარა, შემდეგ კი − გასაუბრება სპეციალურ კომისიასთან.

სამთავრობო კომისიის შემადგენლობაში იყვნენ აღმასრულებელი, საკანონმდებლო და სასამართლო ხელისუფლების პირველი პირები, საქართველოს სახალხო დამცველი, არასამთავრობო ორგანიზაციებისა და აკადემიური წრეების წარმომადგენლები".

მთავრობის მიერ ევროსასამართლოს მოსამართლის პოსტზე შერჩეული გიორგი ბადაშვილი 2014-2015 წლებში საქართველოს მთავარი პროკურორი იყო, ალექსანდრე ბარამიძე იუსტიციის მინისტრ თეა წულუკიანის მოადგილეა 2012 წლის შემოდგომიდან, ხოლო ნანა მჭედლიძე - სამართლის მაგისტრი, მკვლევარი.