ევროპული საქართველოს საარჩევნო შტაბის ხელმძღვანელი, სერგი კაპანაძე, დავით თარხან-მოურავის განცხადებას ეხმაურება, რომლის მიხედვით, ოპოზიციურ პარტიებსა და სახელისუფლებო პარტიას ერთად გაცილებით ნაკლები მხარდაჭერა აქვს, ვიდრე პატრიოტთა ალიანსს.

კაპანაძის თქმით, რუსეთიდან დაფინანსებული პარტიებისა და რუსეთიდან გამოგზავნილ მესიჯბოქსებზე განცხადებები უნდა კეთდებოდეს პროკურატურაში, სადაც უნდა არკვევდნენ, თუ საიდან მოდის მათი დაფინანსება და ვინ აძლევს მათ ინსტრუქციებს.

დეპუტატმა აღნიშნა, რომ ამგვარი პოლიტიკური ძალები უნდა ჩამოშორდნენ პოლიტიკურ საქმიანობას და მათი მაქსიმალური იზოლაცია უნდა მოხდეს.

"თარხან-მოურავის განცხადებებზე, ისევე, როგორც ყველა სხვა პოლიტიკური ძალის განცხადებებზე, რომლებიც რუსეთიდან ფინანსდებიან, რუსულ მესიჯბოქსს ავრცელებენ ხალხში (როგორც ჩანს, ამ შემთხვევაშიც ინსტრუქცია მიიღეს მოსკოვიდან, რომ ასეთი რაღაცები უნდა ილაპარაკონ), ჩემი მხრიდან სერიოზული განცხადება ვერ გაკეთდება.

ამ პოლიტიკური ძალის განცხადებები, ძირითადად, უნდა კეთდებოდეს ხოლმე პროკურატურაში დაკითხვების დროს, როცა უნდა ირკვეოდეს, საიდან მოდის მათი დაფინანსება და ვინ აძლევს მათ ინსტრუქციებს, ამიტომ, მგონია, რომ ეს პოლიტიკური ძალა გაქრება საერთოდ და ჩვენი და საზოგადოების ამოცანა უნდა იყოს, რომ ყოველი არჩევნების შემდეგ, ყველა მსგავსი, რუსეთიდან ღიად დაკავშირებული ძალა ჩამოშორდეს პოლიტიკურ საქმიანობას და მათი მაქსიმალური იზოლაცია უნდა მოხდეს", — აცხადებს კაპანაძე.