შემოსავლების სამსახურის ინფორმაციით, საბაჟო გამშვებ პუნქტ სარფის გავლით საქართველოში თურქეთიდან 25 ტონა კარტოფილით დატვირთული ტრანსპორტი შემოვიდა, რომელშიც მავნე ორგანიზმი, კერძოდ, კარტოფილის კიბო დადასტურდა.

"საბაჟო დეპარტამენტის სანიტარიული, ფიტოსანიტარიული და ვეტერინარული კონტროლის სამმართველოს თანამშრომლების მიერ, ფიტოსანიტარიული პროცედურების განხორციელებისას, კვლევისთვის აღებულ ნიმუშში, კარტოფილის საკარანტინო მავნე ორგანიზმის, კერძოდ — კარტოფილის კიბოს (Synchytrium endobioticum) არსებობა დადასტურდა", — აცხადებენ უწყებაში.

მათივე ინფორმაციით, მთავრობის N463 დადგენილების თანახმად, დაავადებული საქონელი უკან, ექსპორტიორ ქვეყანაში გაბრუნებას დაექვემდებარა.