ქართული ოცნების თავმჯდომარის, ბიძინა ივანიშვილის განცხადებით, მისი პარტიის "რაციონალური და პრაგმატული" მიდგომებით ახერხებენ მშვიდობის შენარჩუნებას მაშინ, როცა საოკუპაციო ხაზის ორივე მხარეს ჰუმანიტარული კრიზისია. მან ისევ ხაზგასმით აღნიშნა, რომ წინა ხელისუფლება "შემოუძღვა ოკუპანტს" ქვეყანაში.

"უმძიმესი მემკვიდრეობის, ურთულესი გეოპოლიტიკური გამოწვევების, და რყევების მიუხედავად, ჩვენ პირველი ხელისუფლება ვართ, ვინც ხანგრძლივად მოვახერხეთ შეგვენარჩუნებინა მშვიდობა და სტაბილურობა, რადგან მიგვაჩნია, რომ სწორედ მშვიდობა და სტაბილურობა წარმოადგენს ქვეყნის გაძლიერების, დემოკრატიული განვითარების და შეუქცევადი წინსვლის ერთ-ერთ უმნიშვნელოვანეს საფუძველს.

იმავდროულად, ჩვენ ვახერხებთ გვეჭიროს პრინციპული და ღირსეული პოზიცია, როდესაც საქმე ჩვენი ეროვნული ინტერესების დაცვას ეხება, იქნება ეს ოკუპაციის შედეგების აღმოფხვრა თუ ჩვენი ხალხის ევრო-ატლანტიკური არჩევანის რეალიზაცია.

ოკუპაციის ურთულეს პირობებშიც კი, როდესაც გამყოფი ხაზის ორივე მხარეს, ჩვენი მოქალაქეები ჰუმანიტარული კრიზისის წინაშე არიან, ჩვენი რაციონალური და პრაგმატული მიდგომებით, ვახერხებთ მშვიდობის შენარჩუნებას, რასაც გვიწონებენ და მხარში გვიდგანან ჩვენი დასავლელი პარტნიორები", — განაცხადა მან პარტიის ეკონომიკური პროგრამის წარდგენისას განაცხადა.

მან ისევ დადო ბრალი ყოფილ ხელისუფლებას ომის "პროვოცირებაში:

"ცინიზმის მწვერვალია, როცა პოლიტიკური ძალა, ვინც პირდაპირ შემოუძღვა ოკუპანტს ქვეყანაში და შემდეგ ევროპის საბჭოში საკუთარ სამშობლოს ოფიციალურად დააბრალა ომის დაწყება, დღეს ჩვენ გვდებს ბრალს ბორდერიზაციასა და მცოცავ ოკუპაციაში".

გაიგეთ მეტი ივანიშვილის სიტყვით გამოსვლაზე: