ქართული ოცნების თავმჯდომარის, ბიძინა ივანიშვილის მტკიცებით, ნაციონალური მოძრაობა ცდილობდა მათთვის "უნიათოს" სტატუსი მიეკერებინა და ეს სიმართლე არ არის. მისი თქმით, ენმ-ს სურდა, ეს ქცეულიყო ქართული ოცნების მთავარ მახასიათებლად.

მისივე თქმით, ამოცანა ცხადი იყო, რადგან ვერ "გაათეთრებდნენ" თავიანთ პარტიას, სცადეს ქართული ოცნების "გაშავება.

"მათ შეიმუშავეს მთელი კონცეფცია, რომლის მიხედვით საკუთარი დანაშაულებრივი მმართველობის შედეგად ქვეყნისა და საზოგადოებისთვის მიყენებული ზიანი, მოჩვენებითი აღმშენებლობის პროპაგანდით და მათი ეგრეთ წოდებული ეფექტურობით უნდა გამართლებულიყო, ხოლო ქართულ ოცნება, წარმოჩენილიყო არაკომპეტენტურ და არაფრისშემძლე ერთობად.

ასე დაიწურა მათი პროპაგანდისტური მოძღვრება, ერთ მარტივ ტერმინში — უნიათობა, რომელიც უნდა ქცეულიყო ქართული ოცნების მთავარ მახასიათებლად, ზედსართავ სახელად, რათა მომხდარიყო მმართველი გუნდის დისკრედიტაცია.

მათ წლები მოანდომეს ამ ეპითეტის დამკვიდრებას. ამოცანა ცხადი და კონკრეტული იყო — რაკი ვერაფერი გაათეთრებდა ნაციონალური მოძრაობის წარსულს, ამიტომ უნდა გაშავებულიყო ქართული ოცნება. ამ ორ ძალას შორის კი ქართველ ხალხს უნიათოს ნაცვლად, ეფექტური უნდა აერჩია", — განაცხადა მან.

ივანიშვილი დარწმუნებულია, რომ ამ პრაქტიკამ არ იმუშავა, რადგან ხალხმა ტყუილი და მართალი გაარჩია.

"სიცრუეში დახელოვნებულებმა, საკუთარი შანსი ჩვენს სიმართლეში დაინახეს: ჩვენ არ ვიტყუებოდით და მათსავით, სამ-სამჯერ არ ვხსნიდით რომელიმე ხიდს თუ საწარმოს; წითელ ლენტს არ ვჭრიდით, თითო კილომეტრ დაგებულ გზაზე; არ ვპირდებოდით ხალხს მილიონიანი ქალაქების ორ წელიწადში აშენებას, და საუკუნის პროექტებს არ ვარქმევდით მათ; ვიწრო კოშკში ჩადგმულ საბავშვო ატრაქციონს, ტექნოლოგიურ უნივერსიტეტად არ ვასაღებდით; არ ვაშენებდით მოჩვენებით კეთილდღეობას. ჩვენ ნაბიჯ-ნაბიჯ ვასწორებდით მათ გამრუდებულს და ამიტომ შეგვრაცხეს უნიათოებად", — განაცხადა ივანიშვილმა.

გაიგეთ მეტი ივანიშვილის გამოსვლაზე: