ამერიკის მიერ დაწესებული სანქციებისადმი რუსეთის საპასუხო განცხადება კრემლის ოფიციალურ საიტზე ვრცელდება.

აშშ-დან დიპლომატების გაძევებას კრემლი არამეგობრულ ნაბიჯს უწოდებს:

"ჩვენ არ დავეშვებით უპასუხისმგებლო, სამზარეულოს დონის დიპლომატიამდე".

ოფიციალური განცხადების მიხედვით, რუსეთი ტრამპის ადმინისტრაციასთან მჭიდრო თანამშრომლობას გეგმავს:

"ჩვენ ამერიკელ დიპლომატებს რუსეთში პრობლემებს არ შევუქმნით. მათ შვილებს კრემლში ახალი წლის და შობის ღამეს კრემლში ვეპატიჟებით".

კრემლი "წუხილს გამოთქვამს", რომ ობამა თავის პრეზიდენტობას "ასეთი გადაწყვეტილებით" ასრულებს, თუმცა მას და მის ოჯახს ახალ წელს ულოცავს.

რუსეთი ახალი წლის მილოცვას ასევე უგზავნის დონალდ ტრამპს და ამერიკელებს.

შეგახსენებთ, რომ ამერიკის შეერთებულმა შტატებმა, საპრეზიდენტო არჩევნებში სავარაუდო ჩარევისა და კიბერ-თავდასხმებთან შესაძლო კავშირის გამო, 35 რუსი დიპლომატი გამოაძევა. აშშ-ის სახელმწიფო დეპარტამენტმა ყველა მათგანი პერსონა ნონ-გრატად ხუთშაბათს გამოაცხადა.

რუსეთის საელჩომ დიდ ბრიტანეთში, ამერიკის გადაწყვეტილებას, მისი დიპლომატების ქვეყნიდან გაძევების შესახებ, ტვიტერზე ე.წ. მემეს გამოქვეყნებით უპასუხა.