ალექსეი ნავალნი ბერლინის საავადმყოფოდან გაწერეს, სადაც ის მას შემდეგ მკურნალობდა, რაც ომსკის საავადმყოფოდან მძიმე მდგომარეობაში მყოფი გადაიყვანეს.

"პაციენტის პროგრესზე და მის ამჟამინდელ მდგომარეობაზე დაყრდნობით, მკურნალ ექიმებს სჯერათ, რომ შესაძლებელია მისი სრული გამოჯანმრთელება. თუმცა, ჯერ ისევ ადრეა პოტენციური გრძელვადიანი ეფექტების გაზომვა", — განაცხადეს ბერლინის საავადმყოფოში.

20 აგვისტოს ალექსეი ნავალნი ტომსკი-მოსკოვის თვითმფრინავში შეუძლოდ გახდა და გონება დაკარგა, რის შემდეგაც თვითმფრინავი ომსკში დაეშვა და პოლიტიკოსი საავადმყოფოში გადაიყვანეს.

ნავალნის ახლობლები ითხოვდნენ, რომ იგი სამკურნალოდ უცხოეთში გადაეყვანათ. რუსი ექიმები კი აცხადებდნენ, რომ მძიმე მდგომარეობაში მისი გადაყვანა საშიში იქნებოდა. თუმცა 22 აგვისტოს პოლიტიკოსი გერმანიაში გადაიყვანეს.

სექტემბრის დასაწყისში გერმანიის მთავრობამ განაცხადა, რომ ნავალნი "ნოვიჩოკის" ჯგუფის საწამლავით მოწამლეს. რუსულმა მხარემ მოწამვლასთან ყველანაირი კავშირი უარყო და განაცხადა, რომ ომსკის კლინიკაში გაკეთებულ ანალიზში საწამლავის კვალი არ ჩანდა.

საბოლოოდ, გარდა გერმანული ლაბორატორიისა, არაერთმა ქვეყანამ დაადასტურა, რომ ნავალნი "ნოვიჩოკის" ტიპის საწამლავით იყო მოწამლული.

ალექსეი ნავალნი პუტინის ყველაზე დიდი ოპოზიციონერია. პოლიტიკური აქტიურობის გამო ის მოსკოვში არაერთხელ დააკავეს და ადმინისტრაციული პატიმრობაც მიუსაჯეს. პირველ ჯერზე საპატიმრო დაწესებულებაში მან ათი დღე გაატარა.