სპეციალური პენიტენციური სამსახური აცხადებს, რომ გლდანის N8 დაწესებულების პატიმრებს შორის "სისხლიანი გარჩევა" არ მომხდარა და დაწესებულებაში მყოფმა სამმა პატიმარმა თვითდაზიანებები მიიყენეს. ასე ეხმაურება უწყება მედიაში გავრცელებულ ინფორმაციას ციხეში მომხდარი დაპირისპირების შესახებ.

პენიტენციური სამსახურის თქმით, ციხეში მყოფებმა დაზიანებები წინამხარზე, მრავლობითი ჭრილობების სახით მიიყენეს.

"პატიმრების მოთხოვნა იყო დაწესებულების ადმინისტრაციის მხრიდან ჩაისა (დასაყენებელი ჩაის) და სიგარეტის მიწოდება და სწორედ ამ მოტივით მიიყენეს მათ თვითდაზიანებები", — აღნიშნავენ უწყებაში.

სპეციალური პენიტენციური სამსახური აცხადებს, რომ დაზიანებები არ არის სიცოცხლისთვის საშიში, მსჯავრდებულთა მდგომარეობა სტაბილურია და ამჟამად მიმდინარეობს დაზიანებების დამუშავება. ამასთან, ერთ-ერთ მათგანს, ბრალდებულ გ.დ.-ს უკვე შეხვდა ადვოკატი.