გუშინ მსოფლიო კიდევ ერთი ვარსკვლავის, ჯორჯ მაიკლის გარდაცვალებამ შეძრა და უკვე მეორე დღეა, ყველა წამყვანი საინფორმაციო სააგენტო ამ თემას სხვადასხვა კუთხით განიხილავს.

თუ რამდენიმე წლის წინ დაწერილი სტატიები უმეტესად მომღერლის პირად ცხოვრებას ან კარიერას ეხებოდა, გარდაცვალების შემდეგ ჯორჯ მაიკლის უცნობი მხარეებიც საჯარო გახდა. როგორც აღმოჩნდა, მუსიკოსი საკუთარ ჰონორარს ხშირად რიცხავდა საქველმოქმედო ორგანიზაციებში, მათ შორის, ქალთა, ლგბტ და ბავშვთა უფლებების დამცველ ფონდებში.

აღსანიშნავია გადაცემა ვა-ბანკის ჩაწერაზე მომხდარი ფაქტიც. ჯორჯ მაიკლმა შემთხვევით გაიგო, რომ სტუდიაში მყოფ ერთ-ერთ სტუმარს ინვიტრო განაყოფიერებისთვის 15 000 ფუნტი სჭირდებოდა, მეორე დღეს კი თავად გაუგზავნა ამ ქალბატონს თანხა.

სულ ცოტა ხნის წინ კი გაირკვა, რომ ჯორჯმა ერთ-ერთ სტუდენტ გოგონას სწავლისთვის აღებული სესხი, 5 000 ფუნტი დაუფარა.

წერენ იმასაც, რომ მაიკლი ხშირად შეუნიშნავთ უსახლკაროთა თავშესაფარში, სადაც ის მოხალისედ მუშაობდა.