ინფექციური საავადმყოფოს დირექტორს, თენგიზ ცერცვაძეს არ ესმის, რა არის დღევანდელ შეზღუდვებში ისეთი, რაც მოსახლეობას შეიძლება ყელში ამოუვიდეს. ამის შესახებ მან რუსთავი 2-ის ეთერში ინფექციონისტ მაია ბუწაშვილის კრიტიკის პასუხად ისაუბრა.

"დღევანდელი რეგულაციებია — ნიღბის ტარება, სოციალური დისტანცირების დაცვა, ხალხმრავალი შეკრებებისგან თავის არიდება და ხელების ჰიგიენა. რა არის ამაში ისეთი, რომ იყოს ან დრაკონული, ან იყოს ტოტალიტარიზმის ნიშნის შემცველი, ან ისეთი, რომ რაც მოსახლეობას ყელში ამოუვიდეს?" — იკითხა ცერცვაძემ.

მანვე განაცხადა, რომ ბუწაშვილი და სხვა ინფექციონისტები რამდენიმე თვეა აკრიტიკებენ საკოორდინაციო საბჭოს გადაწყვეტილებებს, მაგრამ უკეთესი ვარიანტი არ შეუთავაზებიათ.

"ასეთი განცხადება, რომ ისეთი ზომები არ უნდა მივიღოთ რომ ყელში არ ამოუვიდეს მოსახლეობას, ამას ყველა იტყვის. ამის თქმაზე იოლი რა არის? მე არ მინდა ახლა უხეში სიტყვა ვიხმარო, თორემ ეს არის დემაგოგია", — განაცხადა ცერცვაძემ.

ამავე ეთერში მან შეაქო საკოორდინაციო საბჭოს მუშაობა, კონკრეტულად მისი ხელმძღვანელი, პრემიერმინისტრი გიორგი გახარია. ცერცვაძის აზრით, გახარია "ღრუბელივით იწოვს საინტერესო წინადადებებს" და ითვალისწინებს რჩევებს.

საკოორდინაციო საბჭოს დაწესებულ შეზღუდვებს აკრიტიკებენ, როგორც სამოქალაქო საზოგადოებაში, ასევე, ოპოზიციაში. მათი განცხადებით, წესებს, რომელსაც მთავრობა აწესებს, თავადვე არღვევენ. ასევე, ამბობენ, რომ შეზღუდვების უმეტესობა არალოგიკურია.