რამდენიმე წუთის წინ პოპვარსკლავმა ლედი გაგამ ახალი ვიდეოკლიპი გამოუშვა, რომელიც სომხური წარმოშობის ცნობილი საბჭოთა კინორეჟისორის სერგო ფარაჯანოვის შემოქმედების გავლენითაა შექმნილი.

ოთხწუთიანი ვიდეოს ძირითადი მონტაჟი, ვიზუალი, ქორეოგრაფია და სიუჟეტის აბსურდულობა მეტწილად ფარაჯანოვის ფილმებისთვის დამახასიათებელი ესთეტიკითაა ნაკარნახები:

ვიდეოს მიწურულს ირკვევა, რომ ის, რაც მანამდე ვიხილეთ, მხოლოდ ფანტაზიის ნაყოფი იყო: მომღერალი ავარიაში მოყვა, ამ შემთხვევის ადგილას კი სომხური კინოს ფესტივალი იმართებოდა და კადრში სერგო ფარაჯანოვის ორი ცნობილი ფილმის პოსტერსაც ვხედავთ: აშუღი ქერიბი და ბროწეულის ფერი.

კადრი ლედი გაგას ვიდეოკლიპიდან 911.

ფოტო: YouTube

ბროწეულის ფერი სერგო ფარაჯანოვმა 1968 წელს გადაიღო და ის არაერთი გავლენიანი კინოხელოვანის მიერ მსოფლიო შედევრადაა აღიარებული.

სწორედ ამ ფილმში მთავარ როლს სოფიკო ჭიაურელი ასრულებს: ის ექვს სხვადასხვა პერსონაჟს — როგორც ქალს, ისე კაცს, განასახიერებს.

სოფიკო ჭიაურელი ფილმში ბროწეულის ფერი.

დაკვირვებულმა კინომოყვარულებმა სხვა ცნობილი რეჟისორების შემოქმედებიდანაც შენიშნეს რეფერენსები: მაგალითად, ფედერიკო ფელინის ფილმიდან 8½

კადრი ლედი გაგას ვიდეოკლიპიდან 911

ფოტო: YouTube

კადრი ფილმიდან 8½

ფოტო: Cineriz

და ალეხანდრო ხოდოროვსკის 1970 წლის კინოსურათიდან El Topo.

კადრი ლედი გაგას ვიდეოკლიპიდან 911

ფოტო: YouTube

კადრი ფილმიდან El Topo

ფოტო: ABKCO Films

ამერიკელი მომღერალი ლედი გაგა ამ კლიპთან დაკავშირებით წერს:

"ეს მოკლემეტრაჟიანი ფილმი ძალიან პირადულ თემებს ეხება, რადგან მასში ასახულია ფსიქიკურ ჯანმრთელობასთან დაკავშირებული ჩემი გამოცდილება და ის, თუ როგორ შეიძლება დაუკავშირდეს რეალობა გამონაგონს და შექმნას გმირები ჩვენში თუ ჩვენ გარშემო".

911 ლედის გაგას რიგით მეექვსე ალბომის Chromantica სინგლია, რომელზეც ეს ვიდეოკლიპი ინდოელმა რეჟისორმა, ტარსემ სინგმა გადაიღო.