თამარ ბაჩალიაშვილის ადვოკატი, მიხეილ რამიშვილი პროკურატურის მიერ გავრცელებულ ინფორმაციას გამოეხმაურა და აღნიშნა, რომ არ ეთანხმება პროკურატურის განცხადებას, რომლის თანახმადაც, მის მიერ გავრცელებული სატელიტის ფოტოები ყალბია.

"იმას არკვევნ, თურმე, ჩემ მიერ წარდგენილი სურათები ცრუ ყოფილა და იმას არ არკვევენ, ავტომობილი რომ არ იდგა. რაც უნდა ის უთქვიათ, არკვიონ, რაა სიცრუე. მაშინ მეც მოვახდენ რეაგირებას, როგორ აყალბებენ მტკიცებულებებს და თავიანთი თავი თვითონ დაიჭირონ", — განაცხადა მიხეილ რამიშვილმა.

ადვოკატის თქმით, გაარკვევს სად მიდის გზები, ვისი ბრალეულობა იკვეთება და არაფრის დათმობას არ აპირებს.

პროკურატურაში განაცხადეს, რომ თამარ ბაჩალიაშვილის ოჯახის ადვოკატის, მიხეილ რამიშვილის მიერ გავრცელებული სატელიტის ფოტოებზე სამართლებრივი რეაგირება ექნებათ. როგორც უწყებაში თქვეს, ექსპერტიზით დადგინდა, რომ ფოტოები დამონტაჟებული და ყალბია.

"ვინაიდან სახეზეა გამოძიების და საზოგადოების მიზანმიმართულად შეცდომაში შეყვანის მცდელობა, ასევე მტკიცებულებების ფალსიფიკაცია, ფაქტზე შესაბამისი სამართლებრივი რეაგირება მოხდება", — აღნიშნეს უწყებაში.

როგორც ბრიფინგზე განაცხადეს, ამ ეტაპზე ვინმეს მიმართ სისხლის სამართლებრივი დევნის დაწყებაზე საუბარი არაა და იგეგმება საგამოძიებო მოქმედებების ჩატარება.

8 სექტემბერს რამიშვილმა განაცხადა, რომ სატელიტის კადრებით დგინდება, რომ 19-20 ივლისს ბაჩალიაშვილის მანქანა ავტობანთან ახლოს, მინდორზე, ანუ იქ, სადაც იგი იპოვეს, არ იდგა.

როგორც პროკურატურაში ამბობენ, რამიშვილმა უარი განაცხადა ეთქვა, რომელ კომპანიას ეკუთვნის ფოტოები და ვინ მიაწოდა ფოტოსურათები.