პარტია მოქალაქეების თავმჯდომარის, ალეკო ელისაშვილის თქმით, მათი პრემიერობის კანდიდატი ლევან იოსელიანი იქნება. ამის შესახებ მან TV Pirveli-ის ეთერში ისაუბრა.

"ჩვენ თუ ღონივრად გავალთ პარლამენტში და ჩვენ ამისთვის ვიბრძვით, ჩვენი პრემიერობის კანდიდატი იქნება ლევან იოსელიანი", — განაცხადა ელისაშვილმა.

ლევან იოსელიანი პროფესიით ადვოკატია. 2019 წელს ის კენჭს იყრიდა სამოქალაქო მოძრაობის სახელით მთაწმინდის მაჟორიტარობის კანდიდატად.

პრემიერობის რამდენიმე კანდიდატი უკვე ცნობილია. მმართველმა გუნდმა მოქმედი პრემიერი, გიორგი გახარია დაასახელა, ნაციონალურმა მოძრაობამ — ყოფილი პრეზიდენტი, მიხეილ სააკაშვილი. რაც შეეხება სტრატეგია აღმაშენებელს, მათი კანდიდატი გიორგი ვაშაძეა.