კრისტოფერ ნოლანის ბლოკბასტერის შემდეგ ახალგაზრდა ბრიტანელ მომღერალ ჰარი სტაილს მალე ახალ დამაინტრიგებელ როლში ვიხილავთ.

ამ წლის დასაწყისში ცნობილი გახდა, რომ ამერიკელი მსახიობი და რეჟისორი ოლივია უაილდი ახალ საინტერესო პროექტზე იწყებდა მუშაობას, რომელშიც ერთ-ერთ მთავარ როლს შაია ლაბაფი შეასრულებდა. თუმცა ამ ცნობილი მსახიობის განრიგი ფილმის გადაღებებს ვერ დაემთხვა, რის გამოც, მან ფილმში მონაწილეობაზე უარი თქვა.

სწორედ მის როლზე დაამტკიცეს სულ ცოტა ხნის წინ 26 წლის ჰარი სტაილსი, რომელსაც ერთგული მსმენელები პოპჯგუფით One Direction იცნობენ, კინომოყვარულები კი კრისტოფერ ნოლანის 2017 წლის ფილმით Dunkirk.

ჰარი სტაილში (მარცხნიდან პირველი) ფილმში Dunkirk.

ფოტო: Warner Bros.

ოლივია უაილდის ახალი ფილმის სახელწოდება Don’t Worry Darling იქნება და თრილერის ჟანრით 1950-იან წლებში კალიფორნიის უდაბნოში შექმნილ უტოპიურ საზოგადოებაზე მოგვითხრობს.

უაილდის მაყურებლები არაერთი კინოროლით იცნობენ, მათ შორის ქართულ პუბლიკაში განსაკუთრებით პოპულარული სამედიცინო სერიალით House. აღსანიშნავია, რომ მომავალი ფილმი მისი პირველი სარეჟისორო ნამუშევარი არ იქნება: 2019 წელს კეიტლინ დევერისა და ბინი ფელდშტენის მონაწილეობით Booksmart გამოვიდა, რომელმაც სადებიუტო ნამუშევრის კვალობაზე კრიტიკოსების საკმაოდ დადებითი შეფასებები დაიმსახურა.

Don’t Worry Darling-ში ჰარი სტაილსთან ერთად Midsommar-ისა და Little Women-ის ვარსკვლავ ფლორენს პიუსა და Wonder Woman-ის მსახიობ კრის პაინს ვიხილავთ.