ამერიკის შეერთებული შტატები სექტემბრის ბოლოსთვის ერაყიდან თავისი ჯარების მესამედს გაიყვანს. BBC-ს ცნობით, ჯარის შუა აღმოსავლეთის მთავარმა მეთაურმა, ფრანკ მაკენზიმ ჟურნალისტებს განუცხადა, რომ ჯარისკაცების რაოდენობა 5 200-დან 3 000-მდე შემცირდება.

"ჯარის ნაწილი დარჩება და ერაყის უსაფრთხოების ძალებს ისლამური სახელმწიფოს ჯიჰადისტების ჯგუფთან ბრძოლაში დაეხმარება", — განაცხადა მაკენზიმ.

გასულ თვეს, აშშ-ს პრეზიდენტმა, დონალდ ტრამპმა განაცხადა, რომ ის ერაყიდან მთელი ჯარის რაც შეიძლება მალე გაყვანას გეგმავდა.

ამერიკელი ჯარისკაცების ერაყის ტერიტორიაზე ყოფნა პრობლემური განსაკუთრებით მას შემდეგ გახდა, რაც იანვარში ამერიკამ ირანის გენერალ-მაიორი, ყასემ სოლეიმანი მოკლა.

რამდენიმე დღის შემდეგ, ერაყის პარლამენტმა კანონი მიიღო, რომლითაც მთავრობას ერაყის ტერიტორიაზე უცხო ჯარის მიერ ოპერაციების შეჩერება დაავალა. თუმცა, კანონის იმპლემენტაცია დღემდე ვერ ხერხდება.

ამერიკის სამზედრო ძალები ერაყის ტერიტორიაზე 2003 წლიდან, სამხედრო ინტერვენციისა და სადამ ჰუსეინის რეჟიმის დამხობის შემდეგ, იმყოფებიან.

ამერიკულმა ქვედანაყოფმა ერაყი 2011 წელს დატოვა, თუმცა 2014 წელს, მას შემდეგ დაბრუნდნენ, რაც ისლამური სახელმწიფოს ექსტრემისტებმა ერაყის დიდი ნაწილი თავიანთ კონტროლს დაუქვემდებარეს.