ლუკაშენკომ რუს ჟურნალისტებთან შეხვედრისას ისაუბრა, რატომ გადაუფრინა დამოუკიდებლობის სახლთან შეკრებილი ხალხს ვერტმფრენით და რატომ გამოჩნდა იმ დღეს, 23 აგვისტოს იარაღით ხელში. მისი მტკიცებით, უნდოდა, ზემოდან დაკვირვებოდა აქციას, როცა "კოსმოსიდან ყველაფრის მაკონტროლებელმა" ამერიკელებმა შენიშნეს, "თავიანთ ცენტრს სიგნალი გადასცეს" და ხალხმა დაშლა მოასწრო. ამის შესახებ ინფორმაცია გამოცემა TUT.BY-მ გაავრცელა.

მე-6 ვადით გაპრეზიდენტებულმა თქვა, რომ სწორედ იმ დღეს ტელეგრამ არხების მეშვეობით გავრცელდა ინფორმაცია, "თითქოს, იგი ოჯახთან ერთად ქვეყნიდან გაიქცა" და ამის უარყოფას ეცადა.

ლუკაშენკო ჟურნალისტებს: ვთქვათ, ჩემ ადგილას ხართ, როგორია თქვენი ქმედება?

ჟურნალისტი: ვაჩვენებდი, რომ ადგილზე ვარ.

ლუკაშენკო: მეც ვაჩვენე, რომ ჩემ ადგილას ვარ. მშიშარა არ ვარ. არ მეშინია.

შემდეგ კი ლუკაშენკომ დაიწყო იმ დღის შესახებ თხრობა:

"დამოუკიდებლობის სახლში სადამკვირვებლო ცენტრი მაქვს. კამერებით ვხედავ ყველაფერს, რაც მინსკში ხდება. გახსოვთ, ალბათ, ისინი პირველად აქ, დამოუკიდებლობის სახლში შემოიჭრნენ (იგულისხმება აქციის მონაწილეები). ცხადია, ჩვენ ეს ვერსია წინასწარ განხილული გვქონდა და სახლიც დაცული იყო. მაგრამ როცა მათ დროზდის მახლობლად გადმოინაცვლეს, ზუსტად ორ კილომეტრში რეზიდენციაში ვერტმფრენი მაქვს. ვფიქრობ, უნდა მენახა, იქ რა ხდებოდა. ჰოდა, ის არის, ჩავჯექი ვერტმფრენში და ამერიკელი ნაძირლები, ხომ იცით, კომოსიდან ყველაფერს უყურებენ, მაშინვე ვარშავის მახლობლად მდებარე თავიანთ ცენტრს გადასცეს სიგნალი, რომ ვერტმფრენი აფრინდა. როგორც კი ეს გაიგეს, მაშინვე დაშლა დაიწყეს. რა თქმა უნდა, მე მაინც ავფრინდი, გადავხედე ზემოდან, რა ხდებოდა. მაგრამ მხოლოდ რამდენიმე ბოევიკი იყო დარჩენილი", — ამტკიცებდა ლუკაშენკო.

ლუკაშენკომ განმარტა, რომ თან ახლდა უსაფრთხოების სამსახურიდან რამდენიმე ადამიანი, ანტიტერორისტული განყოფილებიდან კიდევ 3-4 ადამიანი და თავისი შვილი ნიკოლაი.

"დემონსტრირება მოვახდინე, რომ მეც აქ ვარ და ჩემი შვილებიც. თუმცა, ჩემი პრესმდივანი მომდევდა, რომ გარეთ არ გამოვსულიყავი — ვაიდა, სნაიპერი ყოფილიყო სადმე?" — განაცხადა ლუკაშენკომ.

ასევე, ლუკაშენკომ აღნიშნა, არ შეეძლო გარეთ არ გასულიყო და უსაფრთხოების სამსახურისთვის მადლობა არ გადაეხადა — "მადლობა გადამეხადა ამ ადამიანებისთვის, რომელიც ჯაჭვში იდგნენ და ძალიან ღირსეულად ეჭირათ თავი".

23 აგვისტოს მიმდინარე მასობრივი აქციის მონაწილეები დამოუკიდებლობის სახლისკენ დაიძრნენ, სადაც მათ სპეცრაზმი დახვდა. ხალხი გარკვეული დროით მიმდებარედ დადგა, ლოზუნგებს ყვიროდა და მოგვიანებით დაიშალა.

ამის შემდეგ კი რეზიდენციიდან ქვეყნის პრეზიდენტი ხელში იარაღით გამოვიდა. თან ახლდა 15 წლის შვილი, ნიკოლაი, სამხედრო ფორმაში, ბრონის ჟილეტითა და იარაღით. სპეცრაზმთან მიახლოების შემდეგ, ლუკაშენკომ მათ ლამაზები უწოდა, რის შემდეგაც "ლამაზმა სპეცრაზმმა" იგი ტაშით დააჯილდოვა.