ევროპული საქართველოს საარჩევნო შტაბის ხელმძღვანელი, სერგი კაპანაძე, სახელმწიფო უწყებებს მოუწოდებს, სასწავლო წლის დაწყებამდე მოხდეს მასწავლებელთა ტესტირება კორონავირუსზე.

სერგი კაპანაძის თქმით, ქვეყანაში ეპიდემიოლოგიური მდგომარეობა არასახარბიელოა და სასწავლო წლის დაწყებასთან ერთად იზრდება ვირუსის გავრცელების საფრთხე. კაპანაძე მოუწოდებს ჯანდაცვის სამინისტროს, განათლების სამინისტროსა და უწყებათაშორის საბჭოს, რომ განიხილონ ეს თემა და მასწავლებლებს ჩაუტარდეთ ტესტირება, რათა მოხდეს ვირუსის გავრცელების პრევენცია.

"როგორც ჩვენთვის ცნობილია და რასაც თვალს ვადევნებთ ბოლო დღეების განმავლობაში, ეპიდემიოლოგიური ვითარება და ზრდა სახარბიელო არ არის. იქიდან გამომდინარე, რომ 15 სექტემბერს ოფიციალურად იწყება სწავლა სკოლებში და ზოგიერთმა კერძო სკოლამ უკვე დაიწყო სწავლა, მიგვაჩნია, რომ ძალიან მნიშვნელოვანი იქნება, მოხდეს მასწავლებლების ტესტირება. გამომდინარე იქედან, რომ ვირუსის გავრცელების საფრთხე არსებობს, მნიშვნელოვანია, ვნახოთ სურათი, არიან თუ არა მასწავლებლები ინფიცირებულნი, რათა არ მოხდეს შემდეგში სწრაფი გავრცელება", — აცხადებს სერგი კაპანაძე.

მისი თქმით, ევროპულ საქართველოს სურს, მიმართოს ჯანდაცვის მინისტრს, განათლების მინისტრს და უწყებათაშორის საბჭოს, რომელიც ამ თემაზე მუშაობს, რომ ეს საკითხი განიხილოს.

"მნიშვნელოვანია ჩვენი შვილებისთვის, საქართველოსთვის და მათ შორის მასწავლებლებისათვის, რომ ინფორმაცია არსებობდეს, დაზღვეულები ვიყოთ მაქსიმალურად. გაირკვეს, მასწავლებლებში ხომ არ არის ინფიცირებულების მზარდი რაოდენობა, რაც მნიშვნელოვანი იქნება იმისთვის, რომ შეჩერდეს ან შეყოვნდეს ეპიდემიის გავრცელება", — აცხადებს სერგი კაპანაძე.