გიორგი მღებრიშვილმა დღევანდელ საგანგებო ბრიფინგზე, შინაგან საქმეთა სამინისტროში კადრების შემცირებასთან დაკავშირებით, განმარტა გუშინ, 21 დეკემბერს, მის მიერ გაკეთებული განცხადება და კიდევ ერთხელ აღნიშნა, რომ "ბალასტად" მიიჩნევს ისეთ თანამშრომლებს, რომლებიც პოლიციის მუნდირს პატივს არ სცემენ:

"გუშინ, მე ვიხმარე სიტყვა ბალასტი და გიდასტურებთ, დიახ ბალასტად მივიჩნევ ისეთ ადამიანებს, რომლებიც შეურაცხყოფას აყენებენ პოლიცილის მუნდირს, ჩირქს სცხებენ მას და სწორედ ასეთი ადამიანებისგან იქნება განთავისუფლებული შინაგან საქმეთა სამინისტრო, რომელშიც შესაძლებელია, რომ იყვნენ ასეთი ადამიანები. ბუნებრივია, 40 ათასამდე თანამშრომელი გვყავს სამინისტროში და გამორიცხული არ არის, რომ ასეთები იყვნენ, მეტიც, ყოფილა შემთხვევები რომ ასეთმა ადამიანებმა თავი გამოავლინეს".

მინისტრმა განმარტა, რომ თანამდებობებს შეინარჩუნებენ ის პოლიციელები, რომლებიც სიცოცხლის და ჯანმრთელობის რისკის ფასად იცავენ უსაფრთხოებას:

"ასეთი თანამშრომლები არათუ დარჩებიან, წახალისდებიან და დაწინაურდებიან კიდეც".

გიორგი მღებრიშვილმა ასევე განაცხადა ისიც, რომ მოადგილეებს დაავლა "არაპროდუქტიული" თანამშრომლების სია შეედგინათ:

"დავავალე რომ წარმომიდგინონ იმ თანამშრომლების სია, რომლებიც ნაკლებას პროდუქტიულები იყვნენ თავიანთი მოღვაწეობის პერიოდში, ჩვენ ამ სიას სათითაოდ, ინდივიდუალურად გავივლით და იმ ადამიანებს, რომლებსაც ამოწურული აქვთ რესურსი, გადავუხდით მადლობას და დავემშვიდობებით".