ფილარმონიასთან, კლუბ დეჟავუს აფეთქების დროს დაშავებული ორი პირის მდგომარეობა გაუმჯობესდა. ამის შესახებ ინფორმაცია On.ge-ს ალადაშვილისა და ხეჩინაშვილის კლინიკებში დაუდასტურეს.

როგორც ალადაშვილის კლინიკის ექიმმა განაცხადა, პაციენტის მდგომარეობა სტაბილურია. დაშავებული კლინიკაში გულმკერდისა და კიდურების არეში დამწვრობებით შეიყვანეს. მას, ასევე, ჭრილობები აღენიშნებოდა მხრისა და კისრის არეში.

რაც შეეხება პაციენტს, რომელიც ხეჩინაშვილის კლინიკაში მკურნალობს, ექიმის განცხადებით, მისი მდგომარეობა დამაკმაყოფილებელია და იგი გუშინ, 6 სექტემბერს ამბულატორიულ მკურნალობაზე გაეწერა. აღნიშნული პაციენტი კლინიკაში პოლიტრავმის დიაგნოზით შეიყვანეს, მას გულმკერდისა და მუცლის ღრუს დახურული ტრავმა აღენიშნებოდა.

მესამე დაშავებული კი, რომელიც თბილისის რესპუბლიკურ საავადმყოფოში მკურნალობდა, კლინიკიდან უკვე გაწერეს.

კლუბ დეჟავუში აფეთქება 4 სექტემბერს მოხდა. სავარაუდოდ, ჟანგბადის ბალონი აფეთქდა. შემთხვევის შედეგად 3 ადამიანი დაშავდა, ერთი კაცი კი დაზიანებების გამო გარდაიცვალა.

გამოძიება სისხლის სამართლის კოდექსის 240-ე მუხლის მე-2 ნაწილით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც სიცოცხლის მოსპობა გამოიწვია.