პრორუსული პარტიის, პატრიოტთა ალიანსის ლიდერი ირმა ინაშვილი ოკუპირებული აფხაზეთის აღიარებასთან დაკავშირებით გავრცელებულ ინფორმაციას "ინტერპრეტირებულ დეზინფორმაციას" უწოდებს. ინაშვილი ბოლოს დროს მისი პარტიის მიმართ გამოთქმულ კრიტიკულ შეფასებებს ალიანსის წინააღმდეგ მიმართულ პროვოკაციად აფასებს.

"ეს რომ ასე ყოფილიყო, როგორ ფიქრობთ თქვენ, აფხაზეთში მე არ დამხვდებოდნენ აფხაზი ჟურნალისტები და ჩემგან სიხარულით არ აიღებდნენ კომენტარს? მე არ მინდა საუბარი იმ დახურულ შეხვედრაზე და მის დეტალებზე. ვრცელდება ინტერპრეტირებული დეზინფორმაცია, იმიტომ რომ აფხაზეთშიც არიან ბოკერიები და სააკაშვილები, რომლებსაც შერიგება არ უნდათ, როგორც თბილისში და მათ შორის კავშირს მე პირადად მკაფიოდ ვხედავ", — განაცხადა ინაშვილმა ჟურნალისტებთან საუბრისას.

ინფორმაცია იმის შესახებ, რომ პატრიოტთა ალიანსი ოკუპირებული აფხაზეთის შემდგომი აღიარებისთვის მზად არის ადგილობრივმა მედია აფსნიფაბლიქმა გაავრცელა.

პატრიოტთა ალიანსის ლიდერების, ირმა ინაშვილისა და დავით-თარხან მოურავის სოხუმში ყოფნის შესახებ ინფორმაცია მთავარმა არხმა, 20 აგვისტოს გაავრცელა.

აფხაზეთის დე ფაქტო პრეზიდენტის წარმომადგენელმა, ლაშა საყანიამ თავიდან უარყო, შემდეგ კი დაადასტურა, რომ ოკუპირებულ რეგიონში პატრიოტთა ალიანსის ლიდერებს შეხვდა. შეხვედრის გამო შექმნილი აჟიოტაჟის გამო ის მოგვიანებით თანამდებობიდან გადადგა. მისი თქმით, აგვისტოს დასაწყისში მეგობრები დაუკავშირდნენ რუსეთის ფედერაციიდან, რომლებმაც სთხოვეს დახმარებოდა დავით თარხან-მოურავს, რომელსაც სურდა, ილორის ეკლესიისთვის ღვთისმშობლის ხატი გადაეცა. საყანიას თქმით, ამ თხოვნას "ჰუმანიტარული მიზნებით" დათანხმდა.

საყანიას განცხადების შემდეგ, შეხვედრა პატრიოტთა ალიანსის ლიდერმა, ირმა ინაშვილმაც დაადასტურა, რომელიც მანამდე ამ საკითხზე კომენტარს არ აკეთებდა. ინაშვილმა ოკუპირებულ აფხაზეთში ვიზიტისას გადაღებული ფოტოებიც გამოაქვეყნა. მისი თქმით, ფოტოები 18 აგვისტოს აფხაზეთში, ილორის ტაძარშია გადაღებული, სადაც მან ტაძარს ღვთისმშობლის ხატი შესწირა.