ოკუპირებული აფხაზეთის ე.წ. პრეზიდენტის, ასლან ბჟანიას განცხადებით, პატრიოტთა ალიანსი აფხაზეთის შემდგომი აღიარებისთვის მზად არის. ინფორმაციას ამის შესახებ ადგილობრივი მედია აფსნიფაბლიქი ავრცელებს. აფსნიფაბლიქს დე ფაქტო პარლამენტარებმა განუცხადეს, რომ დახურულ შეხვედრაზე, სადაც პატრიოტთა ალიანსის ლიდერების აფხაზეთში ვიზიტს განიხილავდნენ, მათ ბჟანიას ჰკითხეს, რის საფუძველზე დაიწყეს ქართულ მხარესთან ურთიერთობა, რაზეც მან უპასუხა, რომ შეცდომა დაუშვეს. დე ფაქტო პარლამენტარების განცხადებით, ბჟანიამ დე ფაქტო საგარეო საქმეთა სამინისტროს შექმნილ სიტუაციაზე და "მეზობელ რესპუბლიკასთან" ურთიერთობის საჭიროებაზე საკუთარი ხედვის წარმოდგენა დაავალა.

შეხვედრაზე, ასევე, ილორის ეკლესიისთვის პატრიოტთა ალიანსის მხრიდან ხატის გადაცემის საკითხიც განიხილეს, რასაც ბჟანიამ ჰუმანიტარული ჟესტი უწოდა, თუმცა თქვა, რომ ასეთი ქმედება არავისთან შეთანხმებული ყოფილა.

პატრიოტთა ალიანსის პრესსამსახურში On.ge-ს განუცხადეს, რომ მსგავს განცხადებაზე არ სმენიათ და რომ ირმა ინაშვილი კომენტარს მოგვიანებით გააკეთებს.

პატრიოტთა ალიანსის ლიდერების, ირმა ინაშვილისა და დავით-თარხან მოურავის სოხუმში ყოფნის შესახებ ინფორმაცია მთავარმა არხმა, 20 აგვისტოს გაავრცელა.

აფხაზეთის დე ფაქტო პრეზიდენტის წარმომადგენელმა, ლაშა საყანიამ თავიდან უარყო, შემდეგ კი დაადასტურა, რომ ოკუპირებულ რეგიონში პატრიოტთა ალიანსის ლიდერებს შეხვდა. შეხვედრის გამო შექმნილი აჟიოტაჟის გამო ის მოგვიანებით თანამდებობიდან გადადგა. მისი თქმით, აგვისტოს დასაწყისში მეგობრები დაუკავშირდნენ რუსეთის ფედერაციიდან, რომლებმაც სთხოვეს დახმარებოდა დავით თარხან-მოურავს, რომელსაც სურდა, ილორის ეკლესიისთვის ღვთისმშობლის ხატი გადაეცა. საყანიას თქმით, ამ თხოვნას "ჰუმანიტარული მიზნებით" დათანხმდა.

საყანიას განცხადების შემდეგ, შეხვედრა პატრიოტთა ალიანსის ლიდერმა, ირმა ინაშვილმაც დაადასტურა, რომელიც მანამდე ამ საკითხზე კომენტარს არ აკეთებდა. ინაშვილმა ოკუპირებულ აფხაზეთში ვიზიტისას გადაღებული ფოტოებიც გამოაქვეყნა. მისი თქმით, ფოტოები 18 აგვისტოს აფხაზეთში, ილორის ტაძარშია გადაღებული, სადაც მან და პარტიის წევრმა, გიორგი ლომიამ ტაძარს ღვთისმშობლის ხატი შესწირა.