ალადაშვილის კლინიკის ექიმის განცხადებით, ფილარმონიასთან აფეთქების შემდეგ მათთან 33 წლის კაცი შეიყვანეს. მისი თქმით, პაციენტს სუნთქვის მწვავე უკმარისობა და ტრავმული შოკი აქვს, რაც სიცოცხლისთვის საშიშია. მისივე თქმით, პაციენტი მართვით სუნთქვაზე გადაიყვანეს.

"პაციენტი გადაყვანილი იქნა შემოსვლისთანავე მართვით სუნთქვაზე. აღენიშნება მრავლობითი დაზიანებები სახის არეში, დამწვრობა სახისა და გულმკერდის არეში, ჭრილობები მხრის, გულმკერდის და კისრის არეში", — განაცხადა ექიმმა.

მისივე თქმით, ამ ეტაპზე დაწყებულია გაფრთოებული კვლევები და კვლევის შემდგომ გადაწყდება პაციენტის მკურნალობის სტრატეგია.

შინაგან საქმეთა სამინისტროში აცხადებენ, რომ კლუბ დეჟა ვუში აფეთქება, სავარაუდოდ, ჟანგბადის ბალონის აფეთქებამ გამოიწვია. აფეთქების შედეგად 3 ადამიანი დაშავდა, ერთი კაცი კი დაზიანებების გამო გარდაიცვალა. 2 დაშავებული რესპუბლიკურ საავადმყოფოსა და ხეჩინაშვილის კლინიკაში არის გადაყვანილი.

გამოძიება სისხლის სამართლის კოდექსის 240-ე მუხლის მე-2 ნაწილით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც სიცოცხლის მოსპობა გამოიწვია.