ევროპული საქართველოს ერთ-ერთი ლიდერი, სერგი კაპანაძე ამბობს, რომ რუსი ოპოზიციონერის ,ალექსეი ნავალნის მოწამვლაზე ხელისუფლებამ სწორი შეფასებები უნდა გააკეთოს და ყველაფერს თავისი სახელი დაარქვას.

"აუცილებელია დაგმობა იმისა, რაც დასაგმობია და ამას ეს ხელისუფლება არ აკეთებს. ამიტომ, ჩვენი ამოცანაა, რომ ამ არჩევნებზე დავამთავროთ მათ შორის საგარეო პოლიტიკის ეს სამარცხვინო მიმართულება და ეს შევცვალოთ. ამას სჭირდება რეაგირება, განცხადების გაკეთება, იმის თქმა, რაც საჭიროა, ხოლო ხელისუფლება ამას არ აკეთებს", — განაცხადა სერგი კაპანაძემ.

როგორც იგი ამბობს, ხელისუფლების პოზიცია, არა მარტო სხვა ქვეყნის მოქალაქეების მიმართ გამოყენებულ ქიმიურ ნივთიერებაზე, არამედ, მათ შორის, ჩვენი ქვეყნის მოქალაქის მოკვლასთან დაკავშირებით, "როგორც წესი არის დუმილი".

"ეს არის სრულიად მიუღებელი პოზიცია და მიდგომა, ეს არის ძველი მიდგომა, რომელიც უნდა შევცვალოთ და შეუძლებელია ამ მიდგომებით ქვეყანამ იაროს წინ", — აღნიშნავს პარლამენტის დეპუტატი.

გერმანიის მთავრობის განცხადებით, ალექსეი ნავალნი "ნოვიჩოკით" მოწამლეს. ეს არის ქიმიური ნივთიერება, რომელიც ნერვიულ სისტემას ანადგურებს.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, 20 აგვისტოს მოათავსეს, შემდეგ კი გერმანიაში გადაიყვანეს. გერმანელმა ექიმებმა დაადგინეს, რომ ის მოწამლულია.

ნავალნის საქმის გამოძიებასა და დამნაშავეების დასჯას გერმანიის, აშშ-სა და დიდი ბრიტანეთის მთავრობები მოითხოვენ.