საქართველოს შინაგან საქმეთა სამინისტროს ინფორმაციით, დააკავეს პეკინის ქუჩაზე, Skygirls bar-ის დაცვის თანამშრომლები. მათ ბრალად ორი ან მეტი პირის ჯგუფურად ჯანმრთელობის განზრახ დაზიანება ედებათ.

საქმე ეხება ივიკო ფრუიძეს და მასთან ერთად მყოფ პირს. ფრუიძემ Facebook-ზე დაწერა, რომ ბარში მოსთხოვეს გადაეხადა იმ შეკვეთის თანხა, რომელიც მას არ მიუცია, უარის შემდეგ კი დაცვის წევრებმა და თანამშრომლებმა სცემეს. დაკავებულები 1993 წელს დაბადებული ლ.ს. და 2001 წელს დაბადებული ნ.ქ. არიან.

"გამოძიებით დადგინდა, რომ ბრალდებულებმა, რომლებიც თბილისში მდებარე ერთ-ერთ ბარში დაცვის თანამშრომლებად მუშაობდნენ, მიმდინარე წლის 22 აგვისტოს, ამავე ბარის სტუმრების, 1986 წელს დაბადებული ორი პირის — ი.ფ.-სა და ი.გ.-ს მიმართ, ურთიერთშელაპარაკების ნიადაგზე, ფიზიკური ძალადობა განახორციელეს. მომხდარის შედეგად, ი.ფ.-მ და ი.გ.-მ ჯანმრთელობის დაზიანება მიიღეს. მათ შესაბამისი სამედიცინო დახმარება გაეწიათ", — აცხადებენ უწყებაში.

მათივე ინფორმაციით, ტარდება ოპერატიულ-საგამოძიებო მოქმედებები ახალი გარემოებებისა და აღნიშნულ სისხლის სამართლის საქმესთან შესაძლო შემხებლობაში მყოფი სხვა პირების გამოკვეთის და დაკავების მიზნით.

გამოძიება ორი ან მეტი პირის მიმართ ჯგუფურად ჩადენილ ჯანმრთელობის განზრახ დაზიანების ფაქტზე, საქართველოს სისხლის სამართლის კოდექსის 120-ე მუხლის მე-2 ნაწილის "გ" და "დ" ქვეპუნქტებით მიმდინარეობს, რომელი 2-დან 4 წლამდე ვადით თავისუფლების აღკვეთას ითვალისწინებს.