ევროპული საქართველოს წევრი, ირაკლი აბესაძე საარჩევნო პლაკატების გაკვრასთან დაკავშირებით კახა კალაძის განცხადებას პასუხობს.

ირაკლი აბესაძის თქმით, სახელისუფლებო ორგანოები ნაცვლად იმისა, რომ საზოგადოების სამსახურში იყვნენ, ასრულებენ პარტიულ დავალებებს და პოლიტიკური ოპონენტების დევნით არიან დაკავებული.

"საოცარია, რომ ათასი პრობლემის პირისპირ მყოფი ხელისუფლება და აბსოლუტურად ურეიტინგო სახელისუფლებო პარტია, ფლანგავს დროს და იცლის, რომ დევნოს პლაკატები და კვლავ გააჟღეროს მუქარები პოლიტიკური ოპონენტების დაჯარიმების შესახებ. ერთხელ უკვე ვნახეთ, თუ როგორ გაიფლანგა ადმინისტრაციული რესურსი, როდესაც საპატრულო და კრიმინალური პოლიცია, მერიის წარმომადგენლები კონსტიტუციის უხეში დარღვევით და მხოლოდ პარტიული ამოცანის შესრულების მიზნით დასდევდნენ ევროპული საქართველოს აქტივისტებს და აჯარიმებდნენ. სწორედ ეს არის, რისი შეცვლაც სურს ევროპულ საქართველოს ევროპული კოალიციის ფარგლებში არჩევნების დასრულებისთანავე. პოლიცია, სახელმწიფო და მერიის ადმინისტრაცია უნდა იყოს საზოგადოების სამსახურში და უნდა ზრუნავდეს იმ პრობლემების მოგვარებაზე, რაც რეალურად აწუხებს მოსახლეობას და არ უნდა იყოს დაკავებული პარტიული დავალებების შესრულებით, პარტიული დევნით და პოლიტიკური ოპონენტების აქტივისტების დაჭერით", — განაცხადა ირაკლი აბესაძემ.